Eerstens wil ek jou en jou geliefdes ’n voorspoedige 2018 toewens!

Wat Januarie vir my altyd spesiaal maak (ten spyte van ’n bloedbelope banksaldo), is die geleentheid om weer oor te begin. ’n Geleentheid om op terreine in my lewe en besigheid te fokus wat ek dalk afgeskeep het en natuurlik te bou op die goeie gewoontes en resultate van die vorige jaar.

Januarie is natuurlik ook die maand waarin ek Klipkouers se podsendprogram geloods het. Verlede week het ek die tweede verjaarsdag van die potsend gevier!  Ek het die potsend op Maandag, 18 Januarie 2016 met my eerste TV-onderhoud op Die GROOT Ontbyt geloods, asook my eerste potsendonderhoud met die rugbylegende en koffiekoning Kobus Wiese.

Dankie weereens vir jou ondersteuning tot dusver. Jy gee my moed om te volhard in hierdie jong, opwindende en vreemde digitale medium. Ek het groot planne vir die jaar, so hou asseblief hierdie spasie dop!

Wat die jaar vir my en my familie ekstra spesiaal maak, is ons terugkeer na Suid-Afrika ná 14 jaar in Ingils-land. Ons sit Februarie voet aan wal en is baie opgewonde om weer in ons land en tussen ons mense en kultuur te wees. Ek wil glo dat dit vir die meeste Suid-Afrikaners hoop sal gee dat ons Suid-Afrika nog steeds vrywillig kies, ten spyte van al sy groot uitdagings en mense wat emigreer. Die ligpuntjie is dat hierdie uitdagings juis vernuwing afdwing – wat baie goeie nuus vir die land is.

Dit is dan juis gedurende hierdie oppaktyd wat ek opnuut besef hoe baie onnodige gemors mens opgaar, maar meer belangrik, hoe al dié materiële goeters kop en emosionele spasie steel. Hoe kaler die huis word, hoe ligter begin ek voel … Ek dink die goeie gevoel het ook te make met die feit dat ons heelwat goed weggee en ons weet mos dis lekkerder om te gee as om te ontvang. Die grootse verrassing is dat ek nog niks mis nie!

Mag Januarie en Februarie vir jou die geleentheid bied om letterlik en figuurlik ’n bietjie jou huis en kop te spring-clean. Mag jy ligter wees om vinniger te kan hardloop … in die regte rigting, natuurlik.

Hou, bene, hou!