Ek moes ná 14 jaar in Londen myself met verskeie vreemde verskynsels hier in Suid-Afrika vereenselwig. Ek was onder geen romantiese illusie oor wat en wie Suid-Afrika en Suid-Afrikaners geword het in 14 jaar van ons verblyf in Engeland nie. Ek was deeglik bewus van die ekonomiese en politiese uitdagings – en het ten spyte daarvan uit eie keuse besluit ons kom terug. Ek is egter verward oor my ervaring van Afrikaanse Suid-Afrikaners.

Ek weet identiteit kan soos ’n lemoen afgeskil word. Ek ervaar ook magteloosheid as daar ’n onvermoë is om my werklik te hoor, en frustrasie oor die invloed van landswette en die ekonomie op entrepreneurs en werknemers. Ek wil egter die ander kant aanraak.

Ek onthou hoe ons trots Afrikaans gepraat het, en Engels iets was wat beperk was tot die vak Engels op skool. Onthou Chris Barnard wat die eerste hartoorplanting gedoen het. Die C.J. Langenhoven-aanhalings, en die Ruperts se vermoë om welvaart uit niks te skep nie. Ek onthou die samehorigheid Dinsdag- en Donderdagaande as die hele land tot stilstand gekom het vir Afrikaanse TV-programme. Almal kyk dan Transkaroo en Agter elke man. Of wie onthou nog Ballade vir ’n enkeling? Ons was onbeskaamd deel van ’n konteks of ’n milieu.

Wat ek vreemd vind, is dat Afrikaners wegskram van onthou. Ek wil Afrikaners graag aanmoedig om weer te onthou. Onthou die goeie sonder verwyt of spyt. Ons mag onthou sonder om skaam te wees. Ons mag onthou en trots wees. Ons praat Afrikaans. Ja, daar het slegte goed gebeur. Maar waarom lig ons nie weer ons kop op en praat oor die verlede se goeie helde of baanbrekers sonder om eksklusief te klink of ’n spesifieke ras daaraan te koppel nie? As jy sonder spyt kan onthou, is jy gewortel.

Ek het met Jak de Priester gesels oor die sakemodel van ’n vermaaklikheidster en gefokus op sy program Reis na Gister. Jou herinneringe anker jou wortels aan ’n identiteit. Ons hoef dit nie weg te wens nie. Winston Churchill het gesê: “If we open a quarrel between past and present, we shall find that we have lost the future.”

ONTHOU!

Luister hier na my nuutste onderhoud met Jak de Priester.

Klik hier en kry my eBoek 52 GRATIS!