Sosiale media het ’n groen kaart gegee vir opinies lug. Sommige mense reken dit is altyd noodsaaklik om ’n opinie te gee. Die wyse waarop hulle dit uitdruk moet dikwels verskoon word as vryheid van spraak.

Ek wil gereeld op die Twitter-seepkis klim omdat ek ’n regstreekse debat geniet. Ek doen dit egter nie en daar bly ook ’n fyn lyn. ’n Stuk verantwoordelikheid. ’n Besigheidsbeginsel van eerbaarheid.

Die sinonieme is integriteit, respek en agting. Is ek in my onderneming as entrepreneur of in my werksomgewing so gefokus op oorlewing dat ek vergeet wie saam met my in die “oorlog” is? Hanteer ek konflik net so versigtig soos ’n voorlegging aan ’n potensiële kliënt?

Al wat ek weet is dat indien jy in vrede wil leef, jy moet leer om ander mense te respekteer. Die rede waarom ons ander mense moet respekteer is nie omdat ons wil verhoed dat ons by een of ander instansie of kommissie verkla word nie. Nee, ons respekteer ander mense omdat hulle net soveel waarde het as onsself.

Ek het onlangs met Marinus du Plooy van Mufasa Biltong in Perth gesels. Hy het vertel dat hulle so ingestel is op hulle kliënte se ervaring wat aangenaam moet wees, “want mense gee nie om hoeveel jy weet nie, totdat hulle uitvind hoeveel jy omgee”.

Dit het die onderwerp oor respek van vooraf in my wakker gemaak. Ons Suid-Afrikaners het ’n goeie reputasie regoor die wêreld omdat ons daardie basis saam met moedersmelk inkry. Ons seuns staan op vir vroue as hulle ’n vertrek binnestap. Ons stap in ’n vertrek, groet mense, terwyl ons hulle in die oë kyk. Dit is belangrike beginsels wat Suid-Afrikaners ’n goeie naam gee.

ONTHOU!

– Luister na my jongste onderhoud met Marinus du Plooy van Mufasa Biltong. Klik hier.

– Kry my eBoek 52 gratis! Klik hier.