Wêreldwyd is ‘n  inisiatief van AfriForum om nuus en inligting uit te ruil onder Suid-Afrikaners wat gelukkig in die buiteland woon; of mense wat daar gewoon het en terug in Suid-Afrika is; of mense wat steeds buite die grense van die land woon, maar eendag wil terugkeer.

Volgens Sue-Ann de Wet, AfriForum se projekkoördineerder vir Suid-Afrikaanse Diaspora, is Wêreldwyd vir elke Suid-Afrikaner wat tans in die buiteland woon en graag in voeling wil bly met die land. “Die inisiatief behels ‘n webtuiste wat mense help om op hoogte te bly met nuusgebeure in Suid-Afrika. Hier kan hulle ook betroubare advies kry, sommer net saamkuier, hul ervarings deel en meer vertel oor die interessante plekke waar hulle woon en werk. Die Wêreldwyd-span het deeglike navorsing gedoen oor wat vir Suid-Afrikaners in die buiteland belangrik is en dit is juis dié inligting wat op die webtuiste beskikbaar is. Dit sluit in aktuele plaaslike nuus, bydraes – foto’s en stories – van Suid-Afrikaners wat op interessante plekke in alle uithoeke van die aarde woon, asook ‘n enig-in-sy-soort Wêreldgids,” het De Wet gesê.

In die Wêreldgids kan mense inligting uitruil oor waar eg Suid-Afrikaanse produkte in die verskillende lande te koop en beskikbaar is. Enigiets van biltong, Ouma-beskuit, tradisionele blatjang tot restaurante wat Suid-Afrikaanse kos voorsit en selfs dienste kom in die gids voor. Die gids het ten doel om mense wat in die buiteland vreemd voel, te help om ander Suid-Afrikaners te ontmoet en terselfdertyd hul ondernemings te ondersteun. Suid-Afrikaners in die buiteland kan hul ondernemings gratis in die Wêreldgids laat opneem.

Wêreldwyd het ook ‘n gratis weeklikse nuusbrief waarop mense kan inteken by wereldwyd@afriforum.co.za.

Wat bied die nuusbrief, Kollig?

• Die jongste nuus uit Suid-Afrika: Maroela Media verskaf gratis Afrikaanse nuusberigte.
• Nuus van buite Suid-Afrika: van vars nuus wat plaasvind tot feeste en bekende Suid-Afrikaanse kunstenaars wat elders optree.
• Migrasienuus: belangrike inligting oor burgerskap, paspoorte, belasting en so meer.
• Blogs deur emigrante.

Daarbenewens is Wêreldwyd se Facebook-blad ‘n baie gewilde interaktiewe kuierplek vir alle Suid-Afrikaners, plaaslik en die buiteland.

Wêreldwyd wil vir jou die platform skep om saam met ander Suid-Afrikaners regoor die wêreld te kuier, soos net Suid-Afrikaners kan.

Familie en vriende se e-posadresse kan gestuur word aan wereldwyd@afriforum.co.za