AfriForum se saak oor die probleme wat Suid-Afrikaners ondervind wat na dié land terugkeer of gerepatrieer word, word môre virtueel in die Noord-Gautengse Hooggeregshof in Pretoria aangehoor. Die saak handel onder meer daaroor dat mense wat tans uit die buiteland na Suid-Afrika terugkeer vir ’n minimum van 14 dae in ’n staatsfasiliteit in kwarantyn moet bly – en dat daar selfs voorsiening gemaak word daarvoor dat hulle vir dié verpligte verblyf sal moet betaal (hoewel dit nog nie toegepas word nie).

AfriForum het die afgelope drie maande voortdurend klagtes van mense in die fasiliteite ontvang. Klagtes handel oor gebrek aan mediese sorg en medikasie, probleme om kos te kry vir mense wat spesifieke dieetvereistes het, onhigiëniese toestande in sommige van die fasiliteite en tragiese persoonlike omstandighede wat die verblyf van 14 dae – selfs ná hulle negatief getoets het – veroorsaak. Van die mense repatrieer juis weens krisissituasies in hul nabye familie, maar kan dan niks doen om hul geliefdes te ondersteun nie – selfs al toets hulle negatief omdat hulle dié 14 dae steeds moet deursien.

AfriForum wil met dié saak oplossings vir die gerepatrieerdes se probleme vind, sonder dat enigeen se veiligheid in die gedrang kom.