Den Haag – ‘n stad wat so gesellig soos ‘n dorp voel! deur Alana Bailey
In Desember 2015 het ek Nederland en België namens AfriForum besoek. Die meeste van die tyd was Den Haag die “basis” waar ek tuisgegaan het.
Den Haag, ook bekend as ‘s-Gravenhage of The Hague in Engels, het net meer as ‘n halfmiljoen voltydse inwoners. Ou en nuwe geboue vorm hier ʼn mooi geheel.
Dit is die setel van die Nederlandse Parlement. Die Binnehof is die area waaromheen die stad ontstaan het – die Riddersaal daarbinne dateer uit die 13de eeu.
Van Den Haag is dit maklik om na ander Nederlandse stede soos Amsterdam, Rotterdam, Delft, Leiden en selfs ook België te reis. Anders as Amsterdam, word Den Haag nie oorstroom deur toeriste nie. Tog is daar om elke hoek en draai ʼn verrassing …
Dalk loop jy Kersvader en sy takbokke raak in Denneweg. Dié straat is beroemd vir sy vyf hoogtepunte: Gesellige eet- en drinkplekkies, lewenstylwinkels, modeboetieks en skoonheidswinkels. Of jy kosbare antieke porselein of langspeelplate wil koop, dis die straat vir jou!
Met die waarde van die rand wat gedurig tuimel, is daar gelukkig baie mooi tonele wat jou aandag van die verleidelike winkels aflei, soos romantiese bruggies oor die kanale, swane en interessante kunswerke!
Elders klink die klanke van ʼn ou draaiorrel bo die klip-klop van die perd wat dit trek, se hoewe uit.
Op die nat en reënerige Saterdag het meer as ‘n duisend mense stil deur die strate gestap om teen aborsie te betoog. Hulle is deur berede polisie begelei.
Orals is tekens van Kersfees … van die rooi tapyt en reuse Kersboom in De Passage, die oudste winkelsentrum in Nederland wat uit 1885 dateer en ʼn UNESCO-monument is, tot op privaatwonings se deure.
Selfs die winterkoue kan nie die skoonheid van die stad wegsteek nie. Toeriste swig maklik voor die sjarme van Amsterdam, maar as jy ooit in Nederland kom, moenie weggaan sonder om tyd in Den Haag te gaan spandeer nie!
Hoewel dit ‘n stad met al die geriewe is waarvan jy kan droom, het dit die gesellige atmosfeer van ‘n dorp. Snuffel deur die winkels, gaan groet Vermeer se Meisie met die pêreloorbel in die Mauritzhuismuseum of skrop nes op ‘n plein en bestel vir jou krokette en iets warms om te drink. Jy sal amper wens jy kan altyd hier bly!
Deel op
