Emigrasie is ’n groot stap; een wat dikwels dae en dae oorweging, finansiële beplanning en praktiese voorbereiding voorafgaan. Maar selfs al is die logistieke reëlings getref, is daar een aspek waarop min mense regtig voorbereid is: die emosionele prys wat jy betaal wanneer jy jou geboorteland agterlaat.

Jy laat nie net ’n plek agter nie – jy laat ’n lewe agter

Om te emigreer is nie net om ’n nuwe adres te kry nie. Dis om jou wortels uit te trek, dikwels in die hoop dat jy hulle êrens anders sal kan verplant. Jy sê totsiens aan bekende gesigte van familie, vriende en kollegas, en sê hallo vir vreemdelinge en onbekende paaie. Die eenvoudigste dinge, soos ’n gesprek in jou moedertaal by die winkel, die reuk van veldgras ná reën of braaivleis op ’n Saterdagmiddag, begin skielik swaar weeg in afwesigheid.

Verlange het nie ‘n paspoort nie
Een van die mees onverwagte emigrasie-uitdagings is die verlange wat jou tref wanneer jy dit die minste verwag. Jy kan gelukkig wees in jou nuwe land; jy kan suksesvol wees – maar dan hoor jy ’n liedjie van huis toe gaan, of jy ruik iets wat jou aan jou ouma se kombuis herinner, en skielik is daar ’n knop in jou keel. Jy besef: Jy dra nog steeds daardie wêreld in jou.

Tussen twee wêrelde

Baie mense wat emigreer voel asof hulle in twee wêrelde leef. Jy begin by jou nuwe omgewing aanpas, maar jy bly ook vashou aan wie jy was: jou kultuur, jou taal, jou mense. Soms voel dit asof jy nêrens heeltemal hoort nie. Wanneer jy vir ’n besoek na Suid-Afrika terugkeer, voel dinge vreemd; dis nie meer jou daaglikse realiteit nie. En tog voel jy ook in jou nuwe land soms soos ’n buitestaander. Dit kan lei tot ’n diepe gevoel van verlies van identiteit.

Die ongesiene bagasie: die swaar wat nie altyd sigbaar is nie

Almal dra hul eie emosionele bagasie: kinders, huweliksmaats en selfs ouers wat saam emigreer. Die emosionele las van verhuising is nie altyd sigbaar nie. Mense verwag dat jy dankbaar en opgewonde moet wees. Moontlik is jy inderdaad dankbaar en opgewonde, maar daar is terselfdertyd skuldgevoelens, onsekerheid en hartseer. Jy wonder: Het ek die regte besluit geneem? Was die opoffering die moeite werd? Hierdie vrae bly dikwels stil, versteek agter glimlagte en nuwe beginne. Jy voel dikwels skuldig omdat jy mense agterlaat het; jy is bang vir mislukking en het ’n gevoel van verlies wat nie maklik verwoord kan word nie. Omdat emigrasie dikwels beskou word as ’n geleentheid wat jy moet vier, voel baie mense skaam om oor die swaarkry te praat. Jy mag in praktiese opsig dalk ’n beter lewe hê, maar dit beteken nie jy het niks opgeoffer nie.

Wenke om die emosionele las van emigrasie te verlig

Hier is ’n paar praktiese stappe wat jou kan help om emosioneel gesonder by jou nuwe omgewing aan te pas:

1. Behou kontak met jou mense.
   Gebruik tegnologie tot jou voordeel. Maak gereelde video-oproepe met geliefdes, deel foto’s en stuur stemboodskappe. Jy mag fisiek ver wees, maar jy kan emosionele nabyheid behou.
2. Skep nuwe tradisies, maar hou oues lewendig.
   Vier Suid-Afrikaanse feesdae waar jy ook al is, kook bekende geregte en leer jou kinders hul moedertaal. Dit help om jou identiteit te behou, terwyl jy ook ontvanklik is vir nuwe gewoontes.
3. Vind ’n gemeenskap.
   Sluit by plaaslike of aanlyn groepe van ander Suid-Afrikaners of emigrante aan. Hulle begryp waardeur jy gaan sonder dat jy alles hoef te verduidelik, en hulle kan praktiese raad en ondersteuning bied.
4. Praat oor jou emosies.
   Moenie skaam wees om oor verlange of hartseer te praat nie, want dié gevoelens is normaal. Oorweeg dit om met ’n berader of emigrasie-afrigter te gesels as jy sukkel om aan te pas.
5. Behou perspektief.
   Daar gaan goeie en moeilike dae wees. Moenie die moeilike oomblikke as mislukking beskou nie. Aanpassing neem tyd. Vier elke mylpaal, hoe klein ook al.
6. Gee tyd vir aanpassing.
   Moenie van jouself verwag om onmiddellik tuis te voel nie. Groei neem tyd. Wees geduldig met jouself.
7. Laat jouself rou en erken jou verlies.
   Jy het iets verloor: jou land, jou mense en jou roetine. Dis reg om daaroor hartseer te wees.

’n Nuwe begin, maar nie sonder ’n prys nie
Om jou land te verlaat is nie ’n ligte besluit nie. Dit bring verlies mee wat nie altyd raakgesien of erken word nie: verlies aan gemeenskap, aan kultuur in jou alledaagse lewe en soms aan ’n stuk van jouself. In hierdie reis is dit belangrik om nie jou wortels te verloor nie. AfriForum Wêreldwyd ondersteun emigrante deur ’n gevoel van assosiasie met jou taal en kultuur te bied, en met ander mense wat dieselfde pad stap. Ons help jou om steeds met jou taal en kultuur verbind te bly, ongeag waar jy jou bevind.

Lees ook: Wat is die een ding wat jy wens jy in jou tas kon pak toe jy geëmigreer het?