Die Engvallei in Oostenryk is ‘n ongerepte, afgeleë stukkie paradys, omring deur die Alpe. Dit kan per tolpad van Beiere af bereik word. Die rit daarheen is self ʼn belewenis met pragtige brûe, watervalle en bome alom. ‘n Klein boeregemeenskap is in die vallei gevestig. Daar is tekens dat mense al in die Bronstydperk daar rondgetrek het, maar die huidige nedersetting se gedokumenteerde geskiedenis strek terug tot 1523. Die kapel, wat uit ongeveer 1700 dateer, is gewild vir troues. In die winter skep sneeustortings ‘n groot gevaar en word die dorpie van die wêreld afgesny. Dit word dan ontruim. Besoekers aan die vallei kan die boere se heerlike produkte geniet, insluitend groot glase yskoue karringmelk, kaas en droëworsies wat baie aan salami herinner. Fietsryers en stappers sal hier heelwat te doene vind, maar ‘n mens kan sommer ook net iewers gaan sit en probeer besluit watter rigting bied die mooiste opsie vir foto’s. Al geluide hoorbaar, is die wind wat deur die bome suis en die gerinkel van die koeie se klokke. Die natuurskoon en stilte van die vallei is ‘n lafenis vir die siel!