Vir Suid-Afrikaners wat buite die land se grense woon en werk, is ’n paspoort ’n belangrike dokument wat nie net toegang tot internasionale reis verseker nie, maar ook ’n bewys van nasionaliteit en identiteit is.

AfriForum Wêreldwyd ontvang baie navrae van Suid-Afrikaners oor paspoorte. Ons het dus ’n vraag-en-antwoordgids vir Suid-Afrikaners saamgestel oor hierdie kwessie.

Hoekom is ’n nuwe paspoort noodsaaklik as ek in die buiteland woon?

Suid-Afrikaners bo die ouderdom van 18 word toegang tot hul tuisland verbied op grond van ’n buitelandse paspoort. Dit is ’n strafbare oortreding om die land te probeer besoek sonder die regte paspoort.

Waar kan ek ’n nuwe paspoort bekom?

Jou paspoort is ’n amptelike staatsdokument wat jou identiteit as Suid-Afrikaner bevestig. Sodra jou paspoort verval, moet jy ’n DHA-73-vorm voltooi, wat jy by die naaste Suid-Afrikaanse ambassade of konsulaat kan kry.

Daar moet ook bepaal word of jy wel ’n Suid-Afrikaanse burger is. Om jou burgerskap te bevestig, word vorm DHA-529 dus ook voltooi.

Let wel dat vereistes effens mag verskil van land tot land. ’n Omvattende lys van die Suid-Afrikaanse ambassades in die buiteland is hier beskikbaar. Besoek gerus die relevante webtuiste vir meer inligting.

Waarom moet ek teenwoordig wees as ek wil aansoek doen om ’n nuwe paspoort?

Derde partye mag nie ’n SA-paspoort namens iemand anders gaan afhaal nie. ’n Paspoort kan ook nie per koerier na ’n persoon wat daarvoor aansoek doen gestuur word nie. Die Suid-Afrikaanse owerhede het hierdie reël in 2022 ingestel om bedrog met Suid-Afrikaanse paspoorte te probeer bekamp.

Aansoek om ’n nuwe paspoort moet altyd in persoon afgehandel word, sodat amptenare kan bevestig:

• dat jy is wie jy sê jy is, met ander woorde, dat jou identiteitsdokument geldig is;
• dat dit werklik jy is op jou paspoortfoto, nie iemand anders nie; en
• dat jou vingerafdrukke op die nasionale bevolkingsregister geregistreer is.

Watter dokumente het ek nodig om ’n nuwe paspoort te bekom?

Wanneer jy gaan aansoek doen vir ’n nuwe paspoort, moet jy sorg dat jy die volgende dokumente byderhand het:

• Die volledige aansoekvorm, wat jy by die ambassade ontvang en voltooi het
• Jou oorspronklike identiteitsdokument
• ’n Afskrif van jou identiteitsdokument
• Indien jy onder die ouderdom van 16 is, word jou geboortesertifikaat, ’n afskrif van die sertifikaat, asook skriftelike toestemming van jou ouers vereis.
• Die volledige DHA-529-vorm wat bevestig dat jy ’n Suid-Afrikaner is wat tans in die buiteland woonagtig is
• Indien jy oor ’n toeristepaspoort beskik, moet jy dit ook saambring.
• Vier volkleur ID-foto’s

Hoeveel gaan ’n nuwe paspoort my kos?

In November 2022 het paspoortfooie met tot  200% verhoog. As voorbeeld hiervan, beloop paspoortfooie tans AUD 103 vir volwassenes in Australië, wat vandag tot ongeveer R1 200 afgerond kan word. Hierdie fooie mag selfs ’n totaal van R2 400 bereik. Deeglike beplanning en begroting vooraf word aanbeveel.

Vir hoe lank is ’n SA-paspoort geldig?

’n Suid-Afrikaanse paspoort is vir 10 jaar geldig en is nie hernubaar nie. Sodra die geldigheidstydperk van ’n paspoort verstryk het, moet jy vir ’n nuwe paspoort aansoek doen.

Die Suid-Afrikaanse owerhede bepaal dat jou paspoort geldig moet wees vir ten minste 30 dae ná die beplande vertrekdatum. Die paspoort moet ook ten minste twee skoon bladsye hê vir aankomstempels. Die leë bladsye sluit die endossementbladsye uit.   

Dit is egter belangrik om in ag te neem dat sommige lande vereis dat jou paspoort vir drie of ses maande ná jou beplande reisdatum geldig moet wees. Aangesien hierdie vereistes van land tot land verskil, raai ons jou aan om met jou reisagent of lugredery te gesels vir raad.

Dit is belangrik om betyds aansoek te doen vir jou paspoort om onnodige probleme en vertragings te voorkom.  

Woon jy in Suid-Afrika?

Deur die eHome Affairs-stelsel kan individue wat in Suid-Afrika woon nou verskeie take verrig, soos om aanlyn aansoeke vir ID en paspoorte in te dien, aanlyn betalings te maak en afsprake te bespreek waar van toepassing. Die insameling van biometriese data, insluitend foto’s, vingerafdrukke en handtekeninge, noodsaak egter steeds ’n besoek aan ’n fisiese tak.

Hier is ’n lys van banktakke in Suid-Afrika waar burgers afsprake kan skeduleer om paspoorte te hernu en om vir slim-ID-kaarte aansoek te doen: http://www.dha.gov.za/index.php/id-smart-card/bank-branches