Herinneringe is die innerlike foto’s wat jy bewaar, koester en vertroetel. Dit is die skatte wat ons diep in ons siele wegsluit om ons harte warm te hou wanneer die verlange te veel raak.
Ons het onlangs vir ons vriende in die buiteland gevra watter herinneringe hulle die meeste koester van Suid-Afrika. Hier is die top-21-herinneringe.
- Die reuk van rooigrond net voor dit begin reën
- Ons mense se humor
- Bosveld-sonsondergang
- Regte-egte tannie se koeksisters
- Meerkatte wat alles en almal dophou
- Toe melk op die stoep afgelaai was
- Toe ek nog ’n graad 1-beesagterkwart vir R75,00 kon koop
- As jong dogtertjie op my perd op pad na my maatjie drie plase van ons af
- ’n Jakkals wat tjank
- Afrikaans – geen ander taal het so ’n lekker woord soos “sommer” nie
- Fonteine in Pretoria, lekker piekniek en treintjie ry
- Kerkklokke op ’n Sondag
- Suid-Afrika se winkeltrollies want Australië se trollies is ’n riller om te gebruik
- Kuier by my Ouma met pap, kaiings en eiers
- Hoëveld-donderstorms
- Hadidas op ’n Saterdagoggend
- Sondae se stilte
- Koer van duiwe wat jou wakker maak in die oggend
- My vriende en familie
- Wafel en melkskommel by Milky Lane, dan ook fliek en ysskaats by Sterland, daarna lekker geëet in Sunnypark by House of Coffees
- Moerkoffie met kondensmelk uit ’n blikbeker saam met beskuit, langs ’n vuurtjie wat vroegoggend uit die as wakker gekrap word
Wat maak jy as die verlange te veel raak?
Dit is natuurlik om soms oorweldig te voel deur verlange na jou mense en geboorteland. Hier is ’n paar praktiese wenke vir daardie dae wat die verlange net te veel raak:
1. Keer terug na jou wortels: Behou jou wortels deur jou geboorteland se tradisies en gewoontes in jou daaglikse roetine te implementeer. Steek so nou en dan ’n braaivleisvuurtjie aan of vat ’n slukkie van die rooibostee wat jou ma saamgestuur het. Vier ook herdenkingsdae soos Erfenisdag, Moedertaaldag en Geloftedag om jou hart opnuut met jou geboorteland saam te snoer.
2. Trooskos is geure wat jou huis toe neem: Trooskos is nie net kos nie, dit is ’n emosionele verbinding met herinneringe, ’n tuiste en kultuur. Maak of eet ’n tradisionele dis soos melktert, bobotie, biltong, vetkoek of ’n braaibroodjie. Dit is ’n tasbare manier om verlange na die bekende en geliefde te verlig.
3. Omring jouself met Afrikaanse klanke: Stel ’n speellys saam van Afrikaanse musiek of luister na ’n podsending en radio-uitsendings in jou moedertaal. Musiek het die mag om jou binne sekondes terug te neem na spesiale oomblikke.
4. Hou gereeld kontak met jou mense: Tegnologie maak dit maklik om met jou familie en vriende kontak te behou, hulle stemme en gesigte tuis te hoor en te sien. WhatsApp, Zoom en Skype is jou beste vriende wanneer die verlange te erg word.
5. Soek ander Suid-Afrikaners naby jou: Sluit aan by plaaslike Suid-Afrikaanse gemeenskappe of groepe. Die saamwees met mense wat dieselfde verlange ervaar, gee ’n gevoel van behoort en ondersteuning.
6. Beplan iets spesiaals: Of dit nou ’n besoek aan Suid-Afrika is, ’n tradisionele Suid-Afrikaanse aandete by jou huis, of selfs ’n kuier saam met Suid-Afrikaanse vriende, die vooruitsig van iets om na uit te sien, kan jou gemoed aansienlik lig.
Hoe AfriForum Wêreldwyd kan help:
AfriForum Wêreldwyd is jou tuiskomplek in die buiteland. Ons netwerk verbind jou met mede-Suid-Afrikaners regoor die wêreld en bied ondersteuning om jou kulturele identiteit te versterk. Ons Wêreldgids verbind jou met Suid-Afrikaanse diensverskaffers in jou omgewing, ons gereelde nuusbriewe hou jou op hoogte van die jongste gebeure, en ons internasionale gemeenskapsinisiatiewe bou brûe tussen Afrikaners wêreldwyd.
Deel gerus jou eie wenke en herinneringe met ons. Stuur vir ons ’n e-pos na wereldwyd@afriforum.co.za en vertel ons van jou gunstelingherinnering van Suid-Afrika.
Foto: Robin Stuart/ Unsplash
Deel op
