Die Suid-Gautengse hoë hof het vandag bevind dat Maite Nkoana-Mashabane, die destydse minister van internasionale verhoudings en -samewerking, se besluit om diplomatieke immuniteit aan Grace Mugabe te verleen, ter syde gestel moet word. AfriForum, Gabriella Engels en verskeie ander partye het ’n tersydestellingsaansoek in hierdie verband gebring.

Regter Bashier Vally wat in Meimaand argumente aangehoor het in die aansoek om die hersiening en tersydestelling van die minister se besluit om diplomatieke immuniteit aan mev. Mugabe te verleen, het bevind dat die minister se besluit ongrondwetlik was en dat sy AfriForum en Engels se regskostes moet dek.

“Ons verwelkom die uitspraak. Hierdie beslissing baan die weg vir die instel van strafregtelike vervolgingstappe teen mev. Mugabe, nadat sy verlede jaar vir Engels, ’n Johannesburgse model, met ’n elektriese verlengingskoord aangeval en ernstig beseer het. AfriForum glo dat die Nasionale Vervolgingsgesag in hierdie verband behoort op te tree, maar so nie staan adv. Gerrie Nel en AfriForum se privaatvervolgingseenheid gereed om Mugabe privaat te vervolg,” sê Willie Spies, AfriForum en Engels se regsverteenwoordiger.