Ek geniet Wêreldwyd se nuusbrief. Dis net tragies dat so baie van ons Suid-Afrikaners ons tuiste in die buiteland moes maak weens omstandighede.

Ons is woon nou al meer as 28 jaar in Nieu-Seeland. Ek was ’n paar keer terug om familie en vriende in Suid-Afrika te besoek. Verlede jaar was ek vir twee maande in Suid-Afrika – die eerste keer in bykans ses jaar. My grootste skok was dat Afrikaans nie meer Afrikaans is nie. Suid-Afrikaners is nie meer trots op hul taal nie en ek sal nie verbaas wees as ons pragtige taal binnekort heeltemal verdwyn nie. In die buiteland praat ons nog ʼn suiwerder Afrikaans. Ons weet wat dit beteken om ons land en taal te “verloor”.

Afrikaans kan met geen ander taal vergelyk word nie. Dis die mooiste taal en dit laat ons lag, want ons uitdrukkings is so beskrywend en snaaks. Ek het na my familie en vriende sit en luister. Alles is amazing, beautiful, great, en so gaan dit aan.

Ek is met ’n seer hart weg en bly om terug te wees in Nieu-Seeland waar ek “suiwer” Afrikaans kan praat. Ons dink voor ons ’n Engelse woord gebruik.

Dis maar my stuiwer in die armbeurs.

Groete uit Nieu-Seeland
Hester