Solidariteit Helpende Hand se maatskaplike afdeling weet hoe om met min baie te vermag. Solidariteit Helpende Hand is ’n gemeenskapsgebaseerde organisasie en fokus veral op volhoubare projekte in die gemeenskap. Met die COVID-19-inperking het werksaamhede radikaal verander. Met die afkondiging van die inperking in Maart het daar geweldige voedselnood by Afrikaner-gesinne ontstaan. Solidariteit Helpende Hand moes binne enkele dae oplossings vind vir die groeiende nood. Die Solidariteit Beweging Krisisfonds is gestig, en die Josef Silo’s waaruit inkomende voedselvoorrade landwyd versprei kan word, is in werking gestel.

Ons moet

In die tydperk Vanaf Maart tot Julie is 16 897 gesinne en 1 303 instansies bygestaan. ’n Bedrag van R 12.3 miljoen is aan voedselnood verleen. Ons besef dat die krisis met verdere inperking en die gevolge daarvan nog meer gaan vererger. Ons moet alternatiewe wyses vind om Afrikaners in staat te stel om die voedselnoodkrisis op te los. Hiervoor is maatskaplike ontwikkeling nodig.

Ons gaan

Die maatskaplike afdeling van Helpende Hand is tans besig met ’n omvattende plan om gemeenskappe op ’n volhoubare wyse te ontwikkel, deur veral opleidingsgeleenthede te ondersoek en maatskaplike programme in gemeenskappe van stapel te stuur. Terapeutiese ondersteuning word ook deur Ons Sentrum aan kinders gebied, sodat angs, spanning en ander maatskaplike kwessies – wat veral in hierdie tyd meer na vore gekom het – aangespreek kan word.

Ons kan

Deur opleiding en programme bemagtig ons gemeenskappe. Alhoewel ons reeds doeltreffende strukture in ons organisasie het en finansieel verantwoordbaar is, is ons fondse beperk. Ons kan met elke klein bydrae ’n groot verskil in iemand se lewe maak. Ons kan met jou hulp en ondersteuning aan elke Afrikaner weer ’n gevoel van “Ek het waarde” gee.

Kontak Solidariteit Helpende Hand vandag by helpendehand.co.za of www.krisisfonds.co.za en maak ’n skenking.