Om oor die Kerstyd 12 308 km van die huis af te wees, verg mannemoed en lang Skype-sessies! Hierdie jaar is ek vir die eerste keer tydens Kerstyd in Oman. Maar hierdie jaar kry ek die grootste geskenk nóg: my familie kom kuier vir my hier in die woestyn! Dis hul eerste besoek aan Oman en ons sien vreeslik daarna uit om hierdie tyd saam te kan geniet. Ons het baie dinge beplan, maar op Oukersaand word daar behoorlik Kersfees gevier! 

Daar het die afgelope jaar of twee ooglopende veranderinge hier in Oman tydens die feesseisoen plaasgevind. Vroeër jare was daar geen teken van enige Kersvierings nie; nou verkoop die winkels hier al selfs Kersbome en Kersversierings. Dit wys jou hoe tegemoetkomend hierdie wonderlike land en sy mense is! Dit bly ’n voorreg! Ons vriende se ouers kom ook en ons het besluit om ’n lekker Suid Afrikaanse Oukersaand te hê. Daar word selfs Secret Santa gespeel en elkeen moes ’n naam uit ’n hoed trek sodat daar darem ’n geskenk oorhandig kan word. Die meeste van ons wat hier bly, hoop en bid natuurlik vir ’n lekker pakkie uit Suid-Afrika met allerlei eetgoedjies en so ou stukkie biltong sal ook nie te versmaai wees nie. Ons sien vreeslik uit na die heerlike samesyn en die absolute voorreg om ons familie hier by ons te kan hê. Dit is nou nie dieselfde as ’n lekker vuur en somersaand in Suid-Afrika nie, maar ons maak verseker die beste van ons tyd hier. Ons hoop maar dat Kersvader iewers op die lughawe ’n ou ekstra geskenkie in die tas gooi voordat die familie hier voet aan wal hier sit.

Phillip Grobler