Die Suid-Afrikaanse Departement van Binnelandse Sake het ’n belangrike stap geneem om duisende Suid-Afrikaners oorsee te help: ’n gebruikersvriendelike digitale portaal waarmee mense hul Suid-Afrikaanse burgerskap kan bevestig of laat herstel.

Hierdie nuwe stelsel bring uiteindelik duidelikheid vir emigrante wat onseker was of hulle hul burgerskap verloor het toe hulle burgerskap van ’n ander land aanvaar het.

Hoekom is hierdie portaal nodig?

Vir baie jare het Suid-Afrikaners hul burgerskap outomaties verloor as hulle burgerskap in ’n ander land verkry het sonder om vooraf vir toestemming (Engels: letter of retention) te vra. ’n Hofuitspraak in 2025 het egter bevestig dat hierdie bepalings ongrondwetlik was.

Dit beteken:

• Enigeen wat hul Suid-Afrikaanse burgerskap weens die ou wetgewing verloor het, word nou geag dit nooit te verloor het nie.
• Die nuwe portaal help mense om hul Suid-Afrikaanse burgerskap amptelik en doeltreffend te bevestig en, waar nodig, te herstel.

Wat doen die nuwe burgerskapherstellingsportaal?

Die portaal is by https://myhomeaffairsonline.dha.gov.za/ beskikbaar en maak dit vir gebruikers moontlik om

• hul huidige burgerskapstatus te verifieer
• te sien of hul besonderhede korrek op die Nasionale Bevolkingsregister verskyn
• ’n aansoek om burgerskapherstelling in te dien indien die stelsel wys dat hulle dit verloor het
• dokumente elektronies op te laai
• hul aansoek aanlyn te volg
• die hele proses sonder ’n besoek aan ’n kantoor of ambassade af te handel.

Vir ekspats is dit ’n groot verligting – veral vir mense wat dikwels jare lank gewag het vir duidelikheid.

Hoe begin ek?

1. Besoek myhomeaffairsonline.dha.gov.za/.
2. Skep ’n profiel of teken aan.
3. Tik jou ID-nommer en persoonlike besonderhede in en heg enige vereiste stawende dokumente aan.
4. Die portaal sal jou status outomaties verifieer
5. Volg die aanlyn aanwysings om die herstelproses af te handel (indien nodig)

Hoekom maak hierdie vir emigrante saak?

Die herstel of bevestiging van jou burgerskap is belangrik vir

• die hernuwing of uitreiking van ’n Suid-Afrikaanse paspoort
• stemreg in Suid-Afrikaanse verkiesings
• die behoud van eiendomsreg, erfreg of belastingstatus
• die moontlikheid om later sonder bykomende administrasie na Suid-Afrika te kan terugkeer.
• die emosionele waarde daarvan om steeds amptelik ’n Suid-Afrikaner te wees.

Vir baie mense dra burgerskap nie net wetlike regte nie, maar ook identiteit, tuisgevoel en kulturele verbondenheid – iets wat AfriForum Wêreldwyd elke dag ervaar in die stories van ons mense in die buiteland.

Wat beteken dit vir die diaspora-gemeenskap?

Hierdie portaal bring

• duidelikheid en sekerheid vir duisende ekspats
• ’n eenvoudige proses wat uiteindelik toeganklik is vanaf enige plek in die wêreld
• die moontlikheid om administrasie vinniger af te handel
• ’n gevoel dat Suid-Afrika sy mense oorsee erken en insluit

Die nuwe burgerskapherstellingsportaal is ’n langverwagte mylpaal vir Suid-Afrikaners regoor die wêreld. Dit gee nie net regtelike duidelikheid nie, maar ook die versekering dat niemand hul Suid-Afrikaanse identiteit verloor het bloot omdat hulle nuwe geleenthede oorsee gevolg het nie.

Vir die diaspora is dit nog ’n manier om die band met Suid-Afrika lewendig te hou – ongeag afstand of tyd.

Lees ook: Van terugslag tot sukses: Hoe Breytenbachs Immigration Consultants ’n kliënt gehelp het om ’n vorige immigrasiebedrogspul te oorkom en Britse burgerskap te verkry