Deur Michelle Vosloo (Ma het gepraat)

Om ’n ma te wees, is uit die staanspoor ’n uitdaging, maar die wonderlikste avontuur ooit en die grootste seën van God!

Gedurende hierdie fase van jou lewe …

• herhaal jy jouself daagliks, duisende kere;
• wens jy soms kinders kan net loop teen die spoed van mens;
• slaap jy om en by 17 ure in ses jaar;
• tel jy 3 miljoen maal (tot die mag oneindig) tot 3; en
• oorleef jy op koffie (met die droom van ’n Ouma-beskuit as jy in die buiteland bly).

Die goeie nuus is, die mensdom het hierdie Eva-uitdaging al duisende jare oorleef en jy gaan ook! As jy ’n moeder in die buiteland is, weet jy dat die gesegde: “Hulle weet nie wat ons weet nie” werklik gemik is op ouerskap.

Wanneer jy ’n mamma word …

• word jy oornag ’n biljoenêr … in terme van krummels;
• begin jy mense dreig … met die wi-fi-wagwoord;
• neem jy allerhande nuwe poste in soos polisieman, skeidsregter, verpleegster, partytjiebeplanner, juffrou, lewensafrigter, sielkundige; en
• kook jy meer kere as wat jy bereid is om te erken kos wat niemand eet nie (terwyl jy snags dinge eet wat niemand in die dag mag eet nie) … maar dis natuurlik net omdat jy moet oorleef.

In die buiteland is jy sonder jou ondersteuningsraamwerk, weg van jou ma se vinnige en betroubare hulp as ’n probleem skielik opduik, vol heimwee oor Ouma se melktert, en waarskynlik in die proses om nuwe, diep vriendskappe te vorm. Dit is juis dan wanneer ouerskap vreeslik oorweldigend kan word.

Jy smag dalk daarna om lewenslesse in jou moedertaal deur middel van stories te kan verduidelik, maar Afrikaanse kinderboekies kos óf ‘n tweede verband op jou huis, óf dit vereis ’n oorywerige skoonma wat bokse uit Suid-Afrika pos, óf dit bly eenvoudig net ’n droom.

Dit is hoekom Ma hierdie “tuisgemaakte”,eenvoudige boekies vir haar kinders geskryf het om te help met die alledaagse huishoudelike uitdagings wat kinders deurgaan. Dit is maklik op Amazon bekombaar. Ek noem hulle tuisgemaak,want hulle is super eenvoudig en glad nie opgesmuk nie, met ’n goeie tikkie humor en baie rympies om die liefde vir Afrikaans te vestig en aan te wakker.

Lewensavonture vir die kleinspan in Afrikaans het gewone raad, met gewone illustrasies om die gewone uitdagings aan te spreek. Lees saam met Ma oor:

• Danika se dors (net voor slaaptyd),
• Fanie se fopspeen (wanneer dit tyd is om daai geliefde troos op te gee)
• Gert se groente (vir die huisgesinne waar julle sukkel om groente in klein lyfies te kry)
• Hessie se haarborsel (vir diegene met kleinserige dogtertjies as hare gekam moet word)
• Kallie is ’n kunstenaar (vir daai tye wanneer klein mensies jou mure versier met permanente ink)
• Santie se sitplekgordel (wanneer jou kinders geleer moet word oor veiligheid in die kar)
• Manie is te moeg vir opruim (wanneer die kamers maar net nie netjies kan bly nie)
• Tonie se tandeborsel (vir die groot uitdaging om daai mieliepitjies skoon te hou)
• Samantha se swembril (wanneer klein lyfies moet leer swem)

Nog ’n groot uitdaging in die buiteland is om jou kinders standvastig in die wete van Jesus as hulle redder groot te maak! In Suid-Afrika kan jy seker in enige groot winkelsentrum instap en ’n Christelike boekwinkel kry om jou by te staan met ouderdomsgepaste materiaal vir hulle geestelike ontwikkeling … in die buiteland kan dit so skaars soos hoendertande wees.

Daarom het Ma ook die reeks Stok Mannetjies vir Jesus geskep wat mettertyd aangevul sal word om ons kinders te help om hulle harte na Jesus te draai. Op die oomblik spreek Ma die volgende uitdagings aan:

• Belinda volg nie haar hart nie (die ontkenning van die wêreldse idee dat jy jou eie hart moet volg in plaas van God se Woord)
• Manie kan nie met Mamma trou nie (wat God se plan is met trou vir ’n man en ’n vrou)
• Moenie boelies boelie nie (dat Jesus lief is selfs vir dié wat ons vervolg)
• Moenie wees wat jy wil wees nie (dat ’n mens jou doel in God se plan moet vind)
• Die wêreld draai nie om Wanda nie (dat die wêreld om Jesus draai en nie ons kinders nie)

Hierdie boekies kom uit Ma se hart en die stories is deel van ons gesin en het my persoonlik baie gehelp om uitdagings te oorkom. Ek deel dit graag met AfriForum Wêreldwyd om ander mammas in die buiteland, wat dalk daarby kan baat vind, te help. Dit is altyd makliker om jou grootste uitdagings in jou moedertaal aan te pak! Dit is altyd lekkerder om dinge te kan sê in Afrikaans.

Watter Afrikaanse hulpmiddels gebruik jy om ’n liefde vir Afrikaans by jou kinders te koester? Lees jy dalk vir hulle Afrikaanse storieboeke? Kyk jy dalk saam na Afrikaanse opvoedkundige programme? Laat weet ons by wereldwyd@afriforum.co.za.