Deur Alana Bailey

Die woud- of grootpapegaai (Poicephalus robustus) is die enigste endemiese papegaaispesie in Suid-Afrika. In Engels staan hulle as Cape parrots bekend. Die voëls word uitgeken aan hulle rooi skouervere. Verder is hulle veredos bruin en groen. Hulle word in die misgordelwoude in die Oos-Kaap, KwaZulu-Natal en Limpopo aangetref. Dit is ook die grootste papegaaisoort in Suider-Afrika en is as Suid-Afrika se voël van die jaar aangewys.

Daar is nog net sowat 1 800 van hulle in die natuur oor. ’n Bewaringsgroep, Cape Parrot Project, onderneem tans aksies in die omgewing van Hogsback in die Oos-Kaap om die unieke voëls se voortbestaan te verseker.

Die voëls broei veral in geelhoubome en omdat die bome met die jare op groot skaal uitgekap is vir onder meer die meubelindustrie, het die voëls se getalle skerp afgeneem.

Cape Parrot Project onderneem nou ’n projek saam met die plaaslike bevolking om Hogsback om die voëls te help. Die gemeenskap word meer geleer oor die voëls, hulle word betaal om nesbokse op te rig en verder kry hulle boomsaad waarmee hulle steggies kan kweek. Die steggies word dan by hulle teruggekoop sodra dit groot genoeg is om aangeplant te word. In die proses leer die gemeenskap ook van plantbewaring en voeding ‒ kennis wat hulle weer vir eie oeste kan benut. Verder word hulle gehelp om onder meer watertenks en skoolskoene vir hulle kinders aan te koop. Beide die gemeenskap en die papegaaie baat dus by die projek!

Woudpapegaaie is sosiaal en leef gewoonlik in groepe van rofweg twaalf saam. Hulle kan tot 100 kilometer per dag vlieg om voedsel te vind. Hulle leef van vrugte en nektar. Die broeiseisoen is van September tot Desember en ook in Mei. Twee tot vier eiers word op ’n keer gelê en beide ouers versorg die eiers en kuikens.

Omdat hulle deur die eeue daarin geslaag het om te oorleef ten spyte van die ontbossing van hulle habitat, word woudpapegaaie as ’n simbool van veerkragtigheid beskou.