Deur Alana Bailey

Sommige mense vrees hulle, ander hou hulle as troeteldiere aan … hoe dit ook al sy, spinnekoppe bly merkwaardige kreature.

Sover ons kon vasstel, is daar 71 spinnekopfamilies, 471 genera en meer as 2 000 spesies in Suid-Afrika bekend. Omdat hulle in alle uithoeke van die land voorkom en wissel in grootte, word nuwe spesies deurentyd ontdek.

Onlangs is aangekondig dat nege nuwe spesies valdeurspinnekoppe van die genus Stasimopus in die Karoo ontdek is.

Soos hulle naam aandui, jag hierdie spinnekoppe op ’n unieke manier. Hulle grawe ’n tonnel wat tot 20 cm breed en 30 cm diep kan wees en bedek die ingang met ’n flap wat van grond, sydraad en plantmateriaal gemaak is. Hulle woon in hulle tonnels. Wanneer hulle jag, hou hulle die valdeur van onder vas tot ’n niksvermoedende prooi oor die valdeur beweeg. Die spinnekop kom dan blitsig te voorskyn, gryp die prooi en sleep dit in die tonnel in om dit te verorber. Nogal skrikwekkend, veral as jy ’n insek soos ’n springkaan of tor, of selfs ’n klein padda is. Hierdie nuwe spesies wat ontdek is, is tot 16 cm in deursnee, pote ingesluit. Duidelik kan hulle groot slagoffers hanteer. Hulle sal nie sommer mense byt nie, maar as dit gebeur kan dit baie seer wees, al is die gif nie gevaarlik vir mense nie.

Valdeurspinnekoppe kan merkwaardig oud word. Een wat aangehou is, het 25 jaar lank geleef! Nog ’n interessante kenmerk is dat vroulike valdeurspinnekoppe goeie moeders is wat hulle eiers in die tonnels lê en die klein spinnekoppies wat uitbroei daar beskerm en voer tot hulle groot genoeg is om vir hulleself te sorg en hulle eie tonnels te grawe.

Hierdie merkwaardige spinnekoppe word wêreldwyd aangetref – laat weet ons gerus as julle van hulle raakloop!

Skryf vir ons

Is jy lief vir die natuur? Het jy al enige interessante dieremaniere dopgehou of pragtige landskappe in die buiteland ontdek? Deel jou staaltjies met ons by wereldwyd@afriforum.co.za

Foto: Michael Podger/ Unsplash

Lees ook: Natuurhoekie – Kyk fyn vir die dolfyn!