Deur Alana Bailey

Daar word beweer dat die ietermagog die wêreld se mees verhandelde soogdier is. Tot soveel as 20% van alle onwettige handel in wildlewe vind met dié diere plaas. Dit gaan veral oor hulle skubbe wat in tradisionele Chinese en Afrika medisyne gebruik word, maar die diere word ook in Asië en Afrika geëet. Verder word hulle vir rituele doeleindes gebruik, of vir die maak van mode-items. Hulle status is tans kwesbaar tot kritiek bedreigd.

’n Polisiebeampte en sy vermeende medepligtige is op 27 Junie 2022 deur die Valke in Johannesburg gearresteer vir die beweerde handel in ietermagogs. Die voertuig waarin hulle was, is by die Suid-Afrikaanse Polisiediens in Mamelodi-Oos geregistreer. ’n Beseerde en getraumatiseerde ietermagog is daarin gevind. Dit is versorg en sal in ’n veilige gebied vrygelaat word. Die twee mans sal in aanhouding bly, hangende verdere ondersoeke.

Die Suider-Afrikaanse ietermagog (Smutsia temminckii) eet hoofsaaklik termiete. Hulle kry slegs een kleintjie op ’n keer, wat tot hulle skaarsheid bydra.