Deur Alana Bailey

Wanneer jy “toktokkie” hoor, dink jy waarskynlik eerste aan die speletjie en kattekwaad in jou kindertyd, maar dit verwys in die eerste plek na ’n baie interessante kewergroep.

Toktokkies behoort aan die kewerfamilie Tenebrionidae. Net in Suid-Afrika word meer as 3 500 spesies in die groep aangetref. Hoewel daar heelwat inligting beskikbaar is oor die klassifikasie van toktokkies, is daar min oor hulle lewenswyse bekend.

Hulle word maklik uitgeken aan hulle swaar, geronde buike waarmee hulle hard op die grond kan klop. Na bewering klop hulle op die grond om toktokkies van die teenoorgestelde geslag aan te lok, maar daar is ook bewerings dat mannetjies dié ritueel as deel van ’n stryd om oorheersing in ‘n gebied gebruik.

Plante en selfs diermateriaal is deel van hulle dieet. Droë habitatte pas hulle goed. Toktokkies beweeg stadig en kan nie vlieg nie, maar tog kom dit voor asof hulle nie juis die prooi van ander spesies word nie. Dit laat die vraag ontstaan wat hulle gebruik om hulle vyande af te skrik? Hopelik sal entomoloë in die toekoms meer aandag aan die fassinerende insekte gee sodat ons meer van die wêreld van die toktokkie kan leer.

Is jy lief vir die natuur? Het jy al enige interessante dieremaniere dopgehou of pragtige landskappe in die buiteland ontdek? Deel jou staaltjies met ons in die kommentaar en merk (“tag”) ons in jou mooiste natuurfoto’s.