Deur Alana Bailey

Die grootste verskeidenheid vetplantspesies op aarde word in Suid-Afrika aangetref, naamlik meer as 4 700 verskillende soorte. Dit wissel van reuse boomaalwyne tot piepklein plantjies wat in uiteenlopende habitatte onder uiterste toestande gedy.

’n Pragtige en prettige nuwe publikasie van Penguin Random House Suid-Afrika stel van die besondere plante aan jonk tot oud bekend.

Vetplantfeetjies is ’n versameling verse en illustrasies oor inheemse vetplante wat ook feetjies is, soortgelyk aan ’n vorige publikasie, Fynbosfeetjies. Antjie Krog en Ingrid de Kok het die digwerk gedoen en Fiona Moodie het vir die kunswerk gesorg. Die plante se volksname word gebruik, maar die wetenskaplike name word ook aangedui. Die boek is in Afrikaans en Engels beskikbaar en sal groot vreugde aan enige liefhebber van die besondere plante gee.