Ek kan nie glo dat twee maande reeds verby is vandat ek my eerste eBoek en digiTydskrif geloods het nie: Klik hier vir meer inligting. 

Ek het natuurlik glad nie geweet wat die reaksie (verkope) sou wees nie, maar kan wel bevestig dat ek nou (of ek wil of nie!) myself in die aanlyn publikasie-arena bevind.

My jongste digiTydskrif-uitgawe het die korporatiewe besigheidsikoon en Afrikaner-gentlemen, Brand Pretorius, op die voorblad: Klik hier vir meer inligting.

Nog ’n wonderlike hoogtepunt was my en my familie se vyf-en-ʼn-halfweeklange vakansie in Suid-Afrika (met ʼn bietjie besigheid tussenin), waar ons meer as 5 000 km gery het. Tydens hierdie reis het ons nuwe dele van ons land gesien en was dankbaar om dit vir ons kinders te kon wys – plekke waar ons 15 jaar laas was en plekke waar ons nog nooit was nie. Ek herinner my aan ons heel eerste en spesiale aand in Philippolis, van alle plekke! Sien die foto hierbo.

Só het ons ook Swart Maandag in aksie gesien op pad Vrystaat toe vanaf Kaapstad: sekerlik ’n dag wat tragedie, hoop en saamstaan simboliseer soos dit lanklaas gesien is.

Maar laat ek jou met ’n belangrike en hopelik ’n inspirerende gedagte bemoedig:

Baie innovasie en deurbrake word gebore uit krisis of ter wille van oorlewing. Daar is ’n rede waarom die Skandinawiese lande so dinamies is, want honderde jare gelede moes hulle slim oplossings genereer of doodeenvoudig sterf.

Die innovasie en geleenthede in Suid-Afrika was en is vir ons as familie tasbaar: innovasie wat gebore word uit ’n gagga politiese en rassistiese klimaat.

Dit bly egter jou keuse: Watter tipe bril gaan jy opsit en in watter lig gaan jy die toekoms sien?

Onthou … aanhouer wen!