Op 6 Mei 2020 het AfriForum ’n belangrike oorwinning behaal toe die Noord-Gautengse Hooggeregshof in Pretoria beslis het dat die Zithabeseni-kwarantynkamp waar meer as ’n honderd mense aangehou is, onmiddellik gesluit moes word.  Die saak het spesifiek oor dié kamp en die mense wat toe daar in aanhouding was, gehandel.

Die hofbevel is van betekenis vir alle Suid-Afrikaners wat na die land wil terugkeer. Dit maak dit naamlik makliker vir hulle om op ordentlike kwarantynomstandighede (wat minstens aan die WGO se standaarde beantwoord) aanspraak te maak, op toetsing wat so gou as moontlik plaasvind en baan ook die weg vir regsaksie om aan hulle die keuse van kwarantyn in ’n staatsfasiliteit, of self-isolasie te bied.

Tans bied die hofbevel nog nie enige reg op die systap van kwarantynmaatreëls nie en waarborg ook nie toetsing of die reg op self-isolasie nie. AfriForum is dus besig met regsaksie in die verband en sal die publiek deur ons sosiale mediakanale oor ons vordering ingelig hou.

Ons het die grootste simpatie met Suid-Afrikaners wat buite die grense gestrand is, maar dit is nie in AfriForum se vermoë om met reisreëlings behulpsaam te wees nie.  Dit is ’n humanitêre proses wat deur die departement van internasionale betrekkinge en samewerking (DIRCO) gefasiliteer word en almal wat steeds buite die grense is en na die land wil terugkeer, moet deurlopend met DIRCO kontak hou.  Die kontakbesonderhede van die beheersentrum wat die skakeling koördineer, is +27 12 351 1754; +27 12 351 1756; Cicc1@dirco.gov.za; of Cicc2@dirco.gov.za.