Wêreldwyd se Wêreldgids skep ’n suksesvolle netwerk om Suid-Afrikaners in die buiteland met mekaar in aanraking te bring sodat jy Suid-Afrikaanse ondernemings in jou omgewing kan ondersteun.

Vat die kans en word deel van hierdie netwerk. Netwerke is nie net vir ondernemings nie; dit is ook ’n waardevolle wyse om ’n ondersteuningsbasis te bou vir daardie dae wanneer die verlange na ’n goeie Suid-Afrikaanse wyn, kuier om ’n braaivleisvuur en die onmisbare Afrikaner-gasvryheid te veel raak.

Die Wêreldgids het tans meer as ’n duisend ondernemings, van prokureurs in Nieu-Seeland tot ’n Suid-Afrikaanse restaurant in Texas.

Hierdie week se onderneming in die Kollig is Spaarwiel in Nederland. Spaarwiel is ’n potgooi wat finansiële onafhanklikheid, persoonlike finansies, spaar- en beleggingsgeleenthede bespreek. Hierdie potgooi word aangebied deur Eduan Kruger waar hy met die gewone man en vrou asook spesialiste gesels oor persoonlik finansies en finansiële onafhanklikheid.

Spaarwiel staaf die vraag: “Wat sal jy kies om met jou tyd te doen as geld nie ’n kwessie is nie?”

Wat ook al dit mag wees, dit sal jou keuse wees, want met finansiële onafhanklikheid sal jy vry wees om te doen wat jy wil. Finansiële onafhanklikheid (FO) word bereik sodra jy genoeg welvaart opgebou het om nie weer afhanklik te wees van ’n aktiewe lopende inkomste nie. Finansiële onafhanklikheid bied jou die vryheid waarna jy nog altyd smag.