Pres. Cyril Ramaphosa het op 20 Januarie dié nuwe belastingwet bekragtig. Dit bepaal dat Suid-Afrikaners wat wil emigreer eers drie jaar nadat hulle nie meer in Suid-Afrika belastingpligtig is nie ’n enkelbedrag uit hul uittree-annuïteite en sommige bewaringsfondse in Suid-Afrika mag onttrek.

’n Enkele toegewing is egter gemaak: Diegene wat hul emigrasie-aansoeke voor 28 Februarie 2021 indien, het tot 28 Februarie 2022 tyd om volgens die ou reëls goedkeuring te verkry vir die onttrekking van ’n enkelbedrag. Hierdie toegewing word verwelkom, aangesien baie potensiële emigrante steeds vertragings ondervind met die verkryging van die nodige permitte en ’n reisverbod in die land waarheen hulle emigreer. Internasionale vlugte is steeds baie duur en nie vrylik beskikbaar nie.

Dit beteken Suid-Afrikaners wat in die buiteland werk maar nog aftreebeleggings in Suid-Afrika het, het nog net ’n maand oor om aansoek te doen om finansieel te emigreer.

LEES OOK: Die driejaarreël en wat dit beteken vir Suid-Afrikaners wat die land verlaat