Adv. Gerrie Nel, hoof van AfriForum se privaatvervolgingseenheid, adv. Phyllis Vorster (aanklaer) en Andrew Leask, hoofondersoeker by die eenheid, is vandeesweek in Botswana in verband met die vervolging van Welheminah Mphoeng Maswabi in dié land. AfriForum het verlede maand aangekondig dat lede van die privaatvervolgingseenheid deur die regering van Botswana aangestel is om die voorverhoorverrigtinge in die saak teen Maswabi te behartig.

Tydens dié besoek, sal ’n hofaansoek gebring word sodat adv. Nel en adv. Vorster toegelaat word as regsverteenwoordigers in die howe van Botswana. Die eenheid sal ook met getuies en belanghebbende partye konsulteer en ’n besoek aan die hof aflê ten einde meer vertroud te word met die hofprosesse in hierdie land.

Maswabi was ’n agent van Botswana se Direktoraat van Intelligensiedienste en word tans in die streeklanddroshof in Broadhurst vervolg vir die besit van onverklaarbare  eiendom en die aflê van ’n valse verklaring met betrekking tot ’n paspoort. Verskeie mediaberigte van mediapublikasies in dié land maak verder bewerings teen Maswabi dat sy terrorisme gefinansier het deur geld te verskuif wat gekoppel kan word aan die voormalige spioenhoof in Botswana, Isaac Kgosi.

Bridgette Motsepe-Radebe, die vrou van oudminister Jeff Radebe en skoonsuster van president Cyril Ramaphosa, word ook in die media daarvan beskuldig dat sy, saam met Maswabi, ’n mede-ondertekenaar was van rekeninge ter waarde van miljarde pula. Adv. Nel en adv. Vorster is verlede jaar deur die regering van Botswana aangestel om sy versoek vir wedersydse regshulp in dié saak met betrekking tot Motsepe-Radebe met die Suid-Afrikaanse regering te fasiliteer.

“Die Botswana regering se vertroue in AfriForum se privaatvervolgingseenheid om hierdie hoëprofielsaak te behartig gee erkenning aan die unieke konsep van privaat vervolging. Dit dui ook op internasionale erkenning vir die integriteit van die eenheid, asook AfriForum as ’n organisasie, wat geregtigheid kan nastreef sonder enige politieke inmenging. Die Suid-Afrikaanse regering se voortdurende versuim om gehoor te gee aan die regering van Botswana se versoek om wedersydse regshulp met betrekking tot Motsepe-Radebe se beweerde betrokkenheid, bewys weereens waarom ’n onafhanklike eenheid soos die privaatvervolgingseenheid noodsaaklik is,” sê Natasha Venter, ’n adviseur by die privaatvervolgingseenheid.