Putten is ‘n dorp in die provinsie Gelderland, rofweg in die middel van Nederland geleë.   Volgens Wikipedia het dit in 2014 ‘n bevolking van 24,148 gehad.  Dit word deur boerderye omring.

Een van die hotelle in die omgewing is die Best Western Premier Kasteel De Vanenburg.  Aan die begin van November 2016 het ek ‘n konferensie wat daar aangebied is, gaan bywoon. 

Die hotel het ‘n interessante geskiedenis.  Die eerste keer wat die naam Vaenenborch voorkom, is in kloosterargiewe van 1389. In dié tyd het die landgoed en kasteel veral op boerdery gefokus – die kasteel is bewoon en daar is aktief geboer.  Teen die tweede helfte van die 17de eeu het dit ’n landgoed geword wat eerder vir ontspanningsdoeleindes deur die eienaars gebruik is, hoewel daar steeds op klein skaal geboer is.  Die “kasteel” is in 1868 herbou.  Daarna het dit verskeie eienaars en gebruike gehad … onder meer as vakansiekolonie en opleidingskool. Deur verval en modernisering het dit byna tot niet gegaan, maar in 1996 het die hotelgroep tot die redding daarvan gekom, en dit tot die voormalige glorie gerestoureer.  Vandag is dit ’n gewilde plek vir die aanbied van spanbouprogramme, konferensies en natuurlik ook huwelike.  Glo my, dit is ’n baie romantiese plek!  Die landgoed van 55 hektaar word omring deur pragtige tuine.  Daar is ook interessante eksotiese bome van alle kontinente wat hier aangeplant is en goed gemerk is vir mense wat in dendrologie belangstel.

Dit is ’n belewenis om die omgewing in herfskleure te beleef, jy kan nie besluit wat om eerste af te neem nie!  ’n Besoek aan Putten en Kasteel De Vanenburg word beslis aanbeveel.