Die komende Brexit – die Verenigde Koninkryk se uittrede uit die Europese Unie – hou vir Suid-Afrikaners wat in die Verenigde Koninkryk wil woon en werk belowende vooruitsigte in. Dit is vroeër in September 2018 vir semigeskoolde werkers bevestig toe die Britse regering ‘n twee jaar lange loodsskema vir seisoenwerkers aangekondig het.

Die doel met die seisoenwerkerskema is om die ernstige arbeidstekort in die Britse landbousektor tydens spitsproduksietye te verlig. Dié arbeidstekort sal na verwagting vererger wanneer die VK die EU verlaat.

Die loodsskema sal eers in die Britse lente van 2019 afskop en tot Desember 2020 duur. Die goeie nuus is egter dat Britse landbouvakbonde die nuwe loodsskema via die Britse media verwelkom het, en reeds van mening is dat die skema nie naastenby ambisieus genoeg is nie. Landbouvakbonde sê meer werkers is nodig op Britse plase. Die Britse regering sê hulle sal eers die resultate van die loodsskema bestudeer en daarna die Britse landboubedryf se langtermynbehoeftes bepaal.

Breytenbachs is optimisties dat dit nog meer goeie vooruitsigte inhou vir Suid-Afrikaners wat op soek is na sulke geleenthede.

Hoe die loodsskema vir seisoenwerkers sal werk

Die loodsskema vir seisoenwerkers sal beskikbaar wees vir werkers van buite die Europese Unie. Suid-Afrikaners kwalifiseer dus om aansoek te doen. Aansoekers moet ten minste 18 jaar oud wees.

Die skema is beperk tot 2 500 werkers per jaar, en die visumhouer mag tot ses maande lank seisoenale werk op Britse plase doen.

Die loodsskema vir seisoenwerkers sal bestuur word deur twee skemabestuurders wat oor die plasing van die werkers sal toesig hou. Daar is nog nie aangekondig wie dié bestuurders sal wees nie.

Ongelukkig het Breytenbachs Immigration Consultants nog geen verdere besonderhede beskikbaar nie, maar ons sal lesers en kliënte wat in hierdie skema belangstel op sosiale media en in ons nuusbriewe inlig oor enige nuwe verwikkelinge.

Besoek gerus ons webwerf by www.bic-immigration.com vir nog nuus.