Uit en tuis is ’n rubriek waar ons gesels met mense wat in die buiteland woon, of wat daar gewoon en gewerk het, maar weer terug is in Suid-Afrika. Ons hoor graag van enigiemand wat hul belewenisse wil deel.

Hierdie week gesels ons met Simoné van Heerden en André Maree wat in Nieu-Seeland woon.

Van waar in Suid-Afrika kom julle en hoekom het julle besluit om na Nieu-Seeland te verhuis?

Ek is van Meyerton, Gauteng, en André van Middelburg, Mpumalanga. My verhuising was onverwags, maar ek het die kans met albei hande aangegryp. André het ’n unieke werksgeleentheid gekry en moes besluit: bly of ry? Ná deeglike oorweging het Nieu-Seeland uitgeblink as die beter keuse.

Vertel ons van julle gesin.

Ons is net twee mense wat die lewe ten volle geniet. André het twee pragtige kinders wat nog op skool is in Suid-Afrika, waarna ons baie verlang. Dis vreeslik moeilik om so ver van hulle te wees, maar mens kyk maar na die groter prentjie want om in Nieu-Seeland te woon en al amper ’n burger van die land te wees, maak soveel deure vir hulle toekoms oop.

Het julle kultuurskok ervaar? Hoe het julle dit oorkom?

Ons dink almal ervaar ’n kultuurskok. Almal is anders. Anders in ’n goeie en slegte manier.

Die name van stede, areas en strate is volksvreemd. Dit vat ’n goeie paar probeerslae om dit uit te spreek op die korrekte manier. Die beste manier om dit te oorkom is om mense te vra hoe om dit uit te spreek en net aan te hou leer soos jy gaan.

Die Engelse “slang” is regtig ’n kultuurskok, en ons wenk is om dadelik uit te vra wat die betekenis daarvan is; soos byvoorbeeld: servo, is ’n vulstasie.

Praat julle nog Afrikaans?

Ons praat slegs Afrikaans in ons huis. 80% van ons vriendekring is Afrikaans en ons praat selfs so 40% Afrikaans by die werk, hoe gelukkig kan ons wees?

Hoe vergelyk ’n tipiese dag in Nieu-Seeland met jou lewe in Suid-Afrika?

Ek werk voltyds en het ’n tweede werk na-ure. Ek gryp elke kans om my drome te verwesenlik. André toer baie vir werk en het al die meeste van Nieu-Seeland gesien. Die lewe is besig, maar minder stresvol, en ek voel veilig om alleen huis toe te ry.

Wat mis julle die meeste van Suid-Afrika?

My familie, vriende en natuurlik Hartenbos! Ek mis ook goeie Suid-Afrikaanse rooiwyn en die reuk van hardehout wat brand vir ’n braai.

Ondersteun julle enige Suid-Afrikaanse ondernemings daar?

Ja, ons koop gereeld by SAFFA Shops! Dis heerlik om Robertson-speserye, Aromat en biltong te kry. André is ook mal oor groen Sweeto! Dit voel soos ’n nostalgiese stap deur die rakke.

Hoe verskil die kos in Nieu-Seeland van Suid-Afrika?

Hulle is maar suinig met speserye! Niks kom by jou ma se kos nie. Ons sal altyd die Feijoa onthou as ons eerste “Nieu Seeland”-vrug wat ons geproe het en die pasteie hier is ongelooflik!

Sal julle ooit terugkeer na Suid-Afrika?

Nie permanent nie, maar ons sal beslis gereeld vir familie en vriende kom kuier.

Wat het julle oor Nieu-Seeland ontdek wat julle nie geweet het nie?

Die geisers is fassinerend – warmwaterbronne wat strale kookwater in die lug uitstoot! Die reuk is vreemd, maar dit is iets om te beleef.

Enige laaste gedagtes?

As ’n geleentheid oor jou pad kom, gryp dit aan! Dit is nie altyd maklik nie, maar dit is die moeite werd. Jy leer jouself ken, verbeter jou vaardighede en bou ’n beter toekoms.

Lees ook: Uit en tuis: ’n e-pos uit Portugal

Skryf vir ons

Woon jy in die buiteland, of het jy dalk onlangs teruggekeer uit die buiteland? Jy kan ook vir ons ’n Uit en tuis-rubriek skryf. Stuur ’n e-pos na wereldwyd@afriforum.co.za en ons stuur vir jou vrae om te beantwoord.