’n Ooievaarstee is een van die spesiaalste oomblikke in ’n aanstaande ma se lewe. Daar is min oomblikke in ’n vrou se lewe so kosbaar as om geboorte te skenk. Dit is ’n tyd van vreugde en opwinding, maar ook soms ’n bietjie hartseer wanneer diegene na aan jou nie fisies teenwoordig kan wees nie.

Gelukkig het tegnologie ons die geleentheid gegee om hierdie vreugdevolle oomblikke steeds met familie en vriende te deel, selfs al woon ons baie ver van mekaar. Deur ’n digitale ooievaarstee te hou kan jy steeds daardie onmisbare band met jou familie en vriende behou, ongeag waar jy is.

Natasha Viljoen, wat tans in Nederland woon, het onlangs haar ervaring van haar digitale ooievaarstee met ons gedeel.

Ek sal nooit die dag vergeet toe ek verras is met my ooievaarstee in Nederland wat my vriendinne hier gereël het nie. Ek het ’n swaarte op my hart gehad want my ma was nie hier nie. Dit was steeds ’n wonderlike dag, want ’n mens besef jy vier ’n nuwe lewe wat op pad is. Ek het natuurlik my oë uitgehuil toe ek ’n geskenk oopmaak wat geen naam opgehad het nie, maar toe ek daardie pajamas met die knopies in my hande hou het ek dadelik geweet dit is ’n pakkie van my ma. Want net ’n ma weet watter pajamas jy nodig het as jy ’n babatjie kry.

’n Week later is daar ’n klop aan my voordeur en hier stap my vriendin binne met ’n skootrekenaar in haar hande, ballonne en emmers vol geskenke. Wat is dit? My aanlyn ooievaarstee met my familie en vriendinne van Suid-Afrika! Sjoe, wat ’n verrassing en hoe spesiaal.

Alhoewel ek alleen gesit en geskenke oopgemaak het terwyl ek na my familie en vriendinne op die TV gekyk het, het ek steeds geweet hoe bevoorreg ek was dat ek só ’n spesiale dag saam met hulle kon vier want tegnologie het dit moontlik gemaak.

Vervang dit die egtheid van persoonlike interaksie? Absoluut nie, maar in tye wat ’n mens nie veel keuses het nie, besef ’n mens dat jy dankbaar moet wees vir die dinge wat wel kan gebeur en hoe tegnologie dit moontlik kan maak.

Natasha se topwenke om só ’n dag te reël:

• Kry die samewerking van die aanstaande pappa.
• Reël dat die familie in Suid-Afrika bymekaarkom, maak ’n aanlyn oproep, saai dit op die TV uit en sodoende kan almal deel wees van die verrigtinge.
• Maak ’n wenslysie op Amazon of by ’n aanlyn winkel in die land waar die verwagtende mamma bly en reël dat die familie en vriende in Suid-Afrika daarop bestel en dit by die aanstaande pappa laat aflewer.
• Koop ballonne, lekker eetgoed en spesiale versierings om die aanstaande mamma se omgewing mooi te maak.
• Maak seker dat jy ’n skootrekenaar en laaier byderhand het sodat jou aanlyn ooievaar nie kortgeknip word nie.
• As jy wel ’n ooievaarstee in jou nuwe land reël saam met vriendinne, maak die ma’s en skoonma’s deel daarvan deur ’n geskenkie namens hulle te koop; maak ’n video-oproep terwyl die persoon dit oopmaak of neem ’n video.
• Laastens, onthou die emosies gaan maar hoog wees, so sorg vir ‘n sneesdoekie en baie foto’s om die dag te onthou. Wees inspirerend en herinner jouself aan hoe bevoorreg jy is om steeds dinge saam met jou familie en vriendinne te kan doen, selfs al is daar ’n groot afstand tussen julle.

Alhoewel niks die warmte en fisiese teenwoordigheid van geliefdes kan vervang nie, bied ’n digitale ooievaarstee wel ’n wonderlike alternatief om die vreugde van ’n nuwe lewe saam te vier. Dit herinner ons daaraan hoe ongelooflik bevoorreg ons is om selfs in die mees uitdagende tye steeds maniere te vind om met mekaar verbind te bly. Deur kreatief te dink en tegnologie te omhels, kan ons steeds hierdie kosbare oomblikke saam geniet en blywende herinneringe skep.

Moenie toelaat dat afstand jou keer om hierdie spesiale oomblikke met jou geliefdes te deel nie. Reël vandag nog jou digitale ooievaarstee en skep ’n geleentheid wat jy en jou familie vir altyd sal koester. Gebruik tegnologie om julle nader aan mekaar te bring – maak jou wenslysie gereed, versier jou ruimte en nooi almal om saam te vier, al is dit van ’n afstand af. Onthou, die liefde en ondersteuning van jou familie en vriende is net ’n video-oproep weg.

Foto: Brooke Cagle/ Unsplash