Wanneer iemand besluit om hul lewe op te pak en na ’n nuwe land te trek, is daar soveel dinge wat jy moet agterlaat – sommige waarvan jy dalk nie eers bewus is totdat jy reeds vertrek het nie. Die verlange na geliefdes, bekende gesigte en daaglikse geriewe kan onverwags intens wees. AfriForum Wêreldwyd het onlangs ons vriende op ons Facebook-blad gevra: “Wat is die een ding wat jy wens jy in jou tas kon pak toe jy geëmigreer het?”Die antwoorde wat ons ontvang het, het ons harte diep geraak.

Die verlange na familie en vriende 

Baie emigrante het genoem dat hul hartsverlange om geliefdes naby te hê, die moeilikste deel van hulle lewe in die buiteland is.

Kristie Townsend, een van ons vriende op Facebook, het gesê: “Ek wens ek kan my skoonma en skoonpa in my tas gepak het! Ek het my skoonma gesien met ons dogtertjie, Claire, se eerste verjaarsdag en dit het vir my en my man baie beteken.”

Helena Meyer sê: “Ek verlang so na my kinders, ek sal sommer met ’n leë tas gaan.”

Baie emigrante het genoem dat hul hartsverlange om geliefdes naby te hê, die moeilikste deel van hul nuwe lewe in die buiteland is. Hierdie verlange na familiebande en die gedeelde oomblikke, groot of klein, is iets wat in byna elke emigrant se ervaring weerspieël word.

Maar dit was nie net familie en vriende wat mense sou saambring nie.

Meer as net mense – dinge wat jou tuis laat voel

Maar dis nie net die mense nie. Vir sommige is dit die klein dinge wat hulle mis, soos Afrikaanse boeke, persoonlike items of selfs die weer!

• Magdel Jansen van Vuuren het gesê sy wens sy het meer Afrikaanse boeke, haar proteadekor en al haar driepootswartpotjies ingepak.
• Vir ander soos Lizel Koekemoer en Angelique Olivier is die verlange na hul honde net so groot soos na hul familie.
• Mariska Swart het gesê sy wens sy het meer foto’s ingepak.
• Carolien Pieterse het geskryf dat sy haar ma, skoonma en res van haar familie sou saambring, maar sy het ook haar loopbaan verloor as gevolg van ’n vaardigheidsevaluering wat sy nie gedoen het nie.
• Carmen Hawkesley wens sy kon “al my mense” saambring, maar ook die berge, oop vlaktes, sonskyn en ’n bosveldvuurtjie.
• Dan is daar die verrassende, maar tog betekenisvolle verlange na dinge soos Woolworths. Cathy Jacobs en Nadine Cronjé stem saam dat Woolies ’n groot gemis is, terwyl Heidemari Boswel met ’n glimlag sê: “Definitief ons familie, dit bly maar die moeilikste opoffering. Natuurlik ook King’s Meat se droëwors, biltong en sosaties!”
• Jozet Müller wens sy kon haar wortels, mense en plekke inpak. Karlien Keen wens sy kon die weer inpak en Lenista van der Merwe wens sy kon haar huishulp inpak.

Deel jou storie met ons

Die emigrasieproses bring nuwe uitdagings en oorweldigende emosies mee. Verlange na familie en bekende dinge is ’n diepgewortelde deel van elke emigrant se ervaring. Het jy ook dinge wat jy wens jy in jou tas kon pak toe jy geëmigreer het? Ons wil graag van jou hoor! Deel jou blog en foto’s met ons.

AfriForum Wêreldwyd – ’n gemeenskap wat jou verstaan

As jy deel van ons wêreldwye gemeenskap is, weet ons hoe belangrik dit is om kontak te behou met jou erfenis en familie. AfriForum Wêreldwyd is hier om jou te help om daardie bande sterk te hou, waar jy ook al is. Sluit aan by ons gemeenskap, deel jou storie en help ons bou aan ’n toekoms waar ons kultuur en tradisies bly voortleef, selfs oor grense heen.

Ons is saam sterker. Deel vandag jou ervaring en herinneringe met ons!

Foto’s: Getty Images/ Unsplash