Soos jy nooit die reuk van ’n stofpad ná die reën sal vergeet nie, so het elke Suid-Afrikaner ervaringe gehad wat ’n mens nie anders kan as om te mis nie. Sê wat jy wil, Suid-Afrika is uniek. Daar is nie veel plekke in die wêreld waar jy oor soveel mooi vlaktes kan uitkyk of so lekker kan skaterlag vir ’n Afrikaanse grap nie. Wat is dit dan wat jy nie net as ’n Suid-Afrikaner mis nie, maar ook as Afrikaner?

Ons het onlangs op Facebook gevra wat mense se gunstelingherinnering van Suid-Afrika is.

“Definitief die Bosveld. Die roep van ’n piet-my-vrou, die sebras in die verte, die reuk van die bosveld, die haak-en-steek-bome, die tarentale in die vlaktes as die son sak, die wildsvleis, die diere. Die lastige volstruis op die wildplaas.” – Protea Delights

“Die reuk van die stof, en die veld – Afrika se reuk. Warmhartige, gemaklike, groot ‘almal en enigeen welkom’ en lang kuiers. Ek luister na Laurika op YouTube en huil lekker lang trane. Ek mis geselserige, vriendelike karwagte en petroljoggies, pragtige strande, en ek mis beskuit! Ek mis my mense die heel meeste, as ek net my hele familie kon inpak!” – Annamarie van Zyl

“My kerk en my mense.” – Hendrika Jooste

“Die plaas! Die slaghuise, die bos, ons eie mense, ons dokters, ons pêlle, tarentale se lawaai, sonbesies in die bos, donderstorms met weerlig, ons eie see, plaasreuke ná die reën, hoenderhane, hadidas, boeremusiek, plaasdansbyeenkomste, die natuur, die Kaap en sy mense, die Drakensberge, die Krugerwildtuin, lekker kuier om ’n braai by pêlle!” – Nico van Heerden

“Huis.” – Yolande van der Merwe

“Gemeenskap.” – T du Plessis

“Die Hoëveld se donderstorms. Familie en vriende. My kultuur. Suid-Afrikaners se humorsin. Die Bosveld. ’n Lekker skaaptjoppie.” – Francois Jonker

“Die weer, jag, familie, skaaptjops, humor by die werk, Afrikaans, sing van psalms in die kerk en die sterre.” – Hendrik Kruger

“Om wasgoed buite in die son droog te maak.” – Rita Reets

“Om my taal te kon hoor in die noorde van Engeland was ongelooflik. Heerlike lag uit volle bors. Regte egte moerkoffie en ons verskeidenheid van kulture en kos. – Louisa Hein

“Gasvryheid, lekker lag, humorsin, kleurryk, die mooiste natuur en mense.” – Karin van Heerden

Wat is jou gunstelingherinnering van Suid-Afrika? Vertel ons in die kommentaar.

Lees ook: Wat mis Suid-Afrikaners in die buiteland die meeste?

Foto: Maurice Gort/ Unsplash