Deur Amanda Visser

Geringe veranderinge is aangebring aan die tweede wysiging van die Immigrasieregulasies wat voorsiening maak vir ’n nuwe drie jaar digitale nomadevisum. Alhoewel die visum geprys word as ’n aansienlike hupstoot vir die Suid-Afrikaanse ekonomie, het belasting- en indiensnemingspesialiste steeds bedenkinge oor risiko’s vir buitelandse werkgewers.

In wese sal die digitale nomadevisum afstandwerkers toelaat om werk vir ’n buitelandse werkgewer in Suid-Afrika te doen, of vir afstandwerkers wat buitelandse inkomste op ’n afstandsbasis verkry. Hierdie veranderinge het verlede week (20 Mei) in werking getree.

Die buitelander moet ’n bruto inkomste van ten minste R1 miljoen per jaar verdien. Indien die visum uitgereik is vir ’n tydperk van nie langer as ses maande in ’n tydperk van 36 maande moet die afstandwerker aansoek doen om vrystelling by die Suid-Afrikaanse Inkomstediens (SAID) om vir belasting te registreer.

Indien die visum egter vir ’n tydperk van langer as ses maande in die tydperk van 36 maande uitgereik word, moet die afstandwerker by die SAID registreer.

Die veranderinge

Bowmans se indiensmenings- en belastingspesialiste, Chloë Loubser, Sian Gaffney en Aneria Bouwer, beklemtoon in ’n onlangse artikel sommige van die veranderinge aan die bepalings in die “tweede weergawe” van die tweede wysigings.

Voorheen was die nomadevisum slegs beskikbaar vir werk wat in Suid-Afrika vir ’n buitelandse werkgewer op ’n afstandsbasis gedoen is. Die gewysigde regulasies verwys egter nou “ietwat lomp” na werk wat vir ’n buitelandse werkgewer gedoen word of vir werkers wat ’n buitelandse bron van inkomste op ’n afstandsbasis verkry.

Loubser sê met die insluiting van die woord “of” kan beoog word om die toepassing van die digitale nomadevisum uit te brei na buitelandse entrepreneurs of individuele konsultante wat vir hulself werk, op ’n afstand.

“Hulle sal nie vir ’n buitelandse werkgewer werk nie, maar sal vermoedelik betaling ontvang van buitelandse kliënte. Die gebruik van die term buitelandse bron van inkomste sal beslis verwarring veroorsaak,” waarsku sy.  

Nog ’n verandering is die tydperk van 36 maande. Voorheen is die buitelandse werknemer vrygestel indien die visum uitgereik is vir ’n tydperk van minder as ses maande in ’n tydperk van 12 maande.

Die tydperk van 36 maande stem ooreen met die maksimum duur van die visum. Hierdie vrystelling sal nie outomaties wees nie, en die werknemer moet aansoek doen vir die vrystelling om as ’n belastingbetaler by die SAID te registreer.

Loubser sê ’n bygevoegde bepaling van die tweede wysiging hou verband met voldoening aan wetgewing wat indiensneming van werkers in Suid-Afrika beheer – indien van toepassing. “Dit is nie heeltemal duidelik uit die bewoording of dit die buitelandse werknemer, of die buitelandse werkgewer is wat vereis word om aan hierdie wetgewing te voldoen nie en watter indiensnemingswetgewing hier oorweeg word nie.”

Sy sê die oogmerk is dalk om te verseker dat die indiensnemingsbepalings en -voorwaardes vir buitelandse werknemers in ooreenstemming is met dié van die Wet op Basies Diensvoorwaardes terwyl hulle in Suid-Afrika werk.

Die risiko’s

Soos sake nou staan, loop buitelandse werkgewers steeds die risiko dat ’n afstandwerker ’n permanente saak vir die buitelandse werkgewer kan skep. Dit kan ’n verpligting veroorsaak om as belastingbetaler en as ’n werkgewer by die SAID te registreer.

“Sonder die verwydering van hierdie belastingrisiko’s, sal die digitale nomadevisum nie die ekonomiese hupstoot bring wat ons land so broodnodig het nie,” waarsku die Bowman-kenners.

Vanuit ’n indiensnemingsperspektief is dit belangrik vir buitelandse werkgewers wat hul werknemers toelaat om afstandwerk vanaf Suid-Afrika te doen om versigtig te wees vir moontlike dienswetlike implikasies.

Die aktiwiteite

Die aktiwiteite wat in die tweede wysiging ingesluit is:

• onderrig by ’n internasionale skool;
• werk gedoen met betrekking tot film- en advertensieproduksie;
• buitelandse joernaliste wat na Suid-Afrika gesekondeer is;
• kunstenaars wat wil skilder, skryf of beeldhou;
• besoekende professors, lektore of navorsers;
• vermaaklikheidskunstenaars;
• toerleiers; en
• godsdienstige leiers van erkende organisasies of denominasies.

Foto: Yankrukov/ Pexels