Kyk die ouer garde van ander lande jou snaaks aan as jy nog na hulle as “Oom” en “Tannie” verwys? Langarmsokkie julle nog in die sitkamer op Afrikaanse sokkietreffers?

Ons kultuur is meer as net melktert en braaivleis. Wat is daardie klein gewoontes wat jy net eenvoudig nog nie kon afskud nie?

Ons het onlangs ons AfriForum Wêreldwyd-vriende op Facebook gevra.

• In Denemarke word almal op die voornaam genoem, maar as my seun by die huis kom sal hy verwys na Oom Paul by die skool. En ook om jou plek op die bus aan te bied vir ’n ouer persoon of te wag by ’n ingang. – Angelique Vogel
• Ons hou gereeld bokjolle op ons dorp in Adelaide, Suid-Australië. – Maritha Keyser
• Eie biltong en droëwors maak en ek bly Afrikaans praat en ’n bottel Pinotage wyn koop waar ek kan. – Truida Pretorius
• Tafelgebed al kom kuier gaste. – Danie Haarhoff
• My man dra ons seuntjie op sy skouers in die winkels – dit verstom die Nederlanders. – Larissa Meyer
• Braai, koeksisters, biltong, droëwors. Ek gaan sokkie nog en maak ons tradisionele kosse en kom almal bymekaar vir ’n lekker kuier! – Roxanne van Zyl
• Definitief om oom en tannie te sê vir ouer mense. Maak nie saak wat baie glo nie, my kinders en ons sal oom en tannie tot daardie persoon anders verkies. Respek vir almal van alle agtergronde. Enige geleentheid is ’n goeie rede vir ’n braai, en die ander dae braai ons omdat ons kan. Ons maak ons eie boerewors en ek bederf my kollegas graag met melktert en Peppermint Crisp-tert. Iets wat nie so “normal” is in Nieu-Seeland nie is om te groet en te vra hoe dit gaan. As iemand sê dankie dan sê ek “You’re welcome!” en baie lyk geskok. – Shar-nica du Plessis
• Braai! Ek maak eie boerewors, droëwors en biltong (het selfs biltongboks gebou). Leer my Franse man om te sokkie. Gebruik selfs “net nou” en “nou-nou” wanneer ek Frans praat. En die ergste ding wat jy kan doen vir die Europeër … loop kaalvoet! – Liesl Schultz Soulard
• Ons praat meer Afrikaans in die VSA as wat ons toegelaat was in Suid-Afrika. – Antionette Taljaard

Foto: Getty Images/ Unsplash