Met emigrasie uit Suid-Afrika wat ’n kenmerk van ons tyd is, is daar ’n groeiende hoeveelheid Afrikaanse publikasies uit die pen van tydelike en permanente emigrante self, maar ook mense wat in Suid-Afrika bly en deur die tema aangegryp word.

’n Voorbeeld in dié verband is Heenkoms, ’n digbundel wat pas uit die pen van Meyer van Rensburg verskyn het.

Hierdie boorling van Upington het in die Noord-Kaap en Noordwes grootgeword en sy loopbaan as klankingenieur by die SAUK begin. Hy was altyd vaardig met die pen en het onder meer lirieke vir musiekkunstenaars geskryf en later ook gedig. Sy debuutbundel, Klankmanwoordboom, het in 1983 verskyn.

Later het hy ook as omroeper by Punt Radio en Radio Kansel gewerk en Teologie begin studeer. In 2004 het hy en sy gesin na Engeland verhuis, waar hy by verskeie kolleges begin klasgee het. Hy het ’n doktorsgraad in Teologie verwerf en sewe werke oor teologiese onderwerpe gepubliseer.

Die bekende digter, skrywer, letterkundige en omroeper, Daniël Hugo, het hom aangespoor om weer te dig en die resultaat is Heenkome, waarin Meyer oor sy jeugherinneringe, die verhuising na Engeland en teologiese idees vertel.

Die bundel se omslag is besonder mooi en dit is verrassend om te lees dat dit die afbeelding van ’n skildery is wat Meyer self geskilder het – hy is voorwaar ’n man van vele talente!

Veral sy skeppings oor Londen, bakens in Kent, Wiltshire en Gloucester, en uiteraard sy gesins-, godsdienstige, doseer- en musiekervarings in Engeland sal vir die lesers van Wêreldwyd interessant wees. Enigeen wat al in die buiteland gewoon en gewerk het, of van dié plekke besoek het, sal heerlik aanklank vind by die beskrywings van sy ervarings en ook die verlange na die suidpunt van Afrika wat altyddeur weer opduik.

• Heenkoms kan teen R200-00 bestel word van Imprimatur Uitgewers by www.imprimatur.co.za.