Finansiële kontrolelys vir teruggekeerdes

23/10/2024

| Deur Fanus Jonck

Finansiële kontrolelys vir teruggekeerdes

Woon en werk jy in die buiteland? Beplan jy om terug te keer na Suid-Afrika? Jy sal voor verskeie veranderinge te staan kom wanneer jy jou weer in Suid-Afrika vestig.

Ons wil graag advies en voorstelle deel om ons ekspats te help.

Voordat jy terugkeer na Suid-Afrika

1. Bankrekeninge

As jy buitelandse beleggings het, is dit die moeite werd om een buitelandse bankrekening oop te hou. Jy hoef nie al jou buitelandse spaargeld terug te bring Suid-Afrika toe nie.
Dit is raadsaam om ŉ rekening te hê wat via die internet toeganklik is, want dit is baie makliker om te beheer. Hou net die bankkoste dop!
Stel die bank in kennis dat jy weggaan en verander jou posadres.
Los ŉ klein balans in die rekening sodat hulle dit nie sluit nie.
As jy geld van die buiteland af oorplaas, kontak fanus@jonck.net vir verskillende opsies om te spaar op valutaoordrag na SA en op bankkoste.
Plaas maandeliks R10 000 tot R20 000 oor na jou SA bankrekening die laaste drie tot ses maande voor jou terugkeer na SA. By jou terugkeer sal dit soos ŉ salaris lyk (asof jy vir jouself werk). Dit sal jou baie moeite spaar as jy selfoonkontrakte, kredietkaartrekeninge, ens. probeer kry.

2. Beleggings

Verkry waardasiesertifikate vir al jou buitelandse beleggings op die datum van jou vertrek. Dit is baie makliker om dit daar te reël en jy het dit nodig wanneer jy in Suid-Afrika aankom.
Benut die laaste weke voor jou terugkeer wyslik om alle belangrike dokumentasie bymekaar te maak.
Hou gewaarmerkte kopieë van aandelesertifikate/dokumente.
Stel jou versekeringsmaatskappye, beleggingsadviseur, maatskappy, ens. in kennis van jou nuwe adres in SA of van ŉ betroubare familielid se adres.
As jy eiendom in die buiteland besit, laat dit in die hande van ŉ betroubare agent.
Sodra jy weer ŉ SA belastingpligtige is, moet jy seker maak dat die land waar jou eiendom geleë is nie belasting van die bruto huur aftrek soos wat hulle verplig is om te doen nie. Verduidelik vir hulle dat jy nie meer ŉ belastingpligtige in daardie land is nie en dus nie aanspreeklik is vir belasting nie. Dit is ingewikkeld en verskil van land tot land. Kontak Fanus by tax@jonck.net as jy onseker is of meer wil weet.

3. Buitelandse belasting

Daar is baie goeie maatskappye wat jou buitelandse belastingsake teen vergoeding sal uitsorteer; dit sal vir jou die moeite werd wees. (Kontak tax@jonck.net vir ŉ verwysing.)
Onthou ook as jy vir ŉ maatskappy gewerk het maar nie die laaste jaar voor jou terugkeer die volle belastingjaar gewerk het nie, kwalifiseer jy gewoonlik vir ŉ belastingterugbetaling!

4. Salarisstrokies

Hou die oorspronklike rekords van jou inkomste en salarisstrokies.
As jy geld in SA inbring, kan die Reserwebank vereis dat jy bewys dat jy die geld in die buiteland verdien het en nie iemand anders se geld saambring nie. Elke keer as ŉ SA bank ŉ groot som buitelandse geld ontvang, moet hulle die Reserwebank daarvan in kennis stel.

5. Bestaande kontrakte

Kanselleer alle bestaande kontrakte. Moenie nalatig wees en nog meer skuld maak nie. Dit sluit selfoonkontrakte, versekering, lidmaatskap van ŉ gimnasium, ens. in.
Moenie uitstaande skuld agterlaat nie! Jy sal op die swartlys geplaas word – en dalk wil jy eendag weer teruggaan.
Dis moeilik om sonder die nodige dokumente te bewys dat jou kontrak beëindig is; hou jou dokumente.
Verkry ŉ geskrewe erkenning dat die kontrak beëindig en ten volle betaal is.
Vereffen die plaaslike rekening se rekeninge (elektrisiteit, water, munisipale belasting, telefoon).

6. Hervestiging/verskeping

Verskeping duur ŉ paar maande; moenie items soos tandeborsels of jou CV op die skip sit nie.
Laat al jou splinternuwe goed ŉ bietjie tweedehands lyk, anders moet jy BTW betaal by die doeane in SA.
Betaal die ekstra vir ŉ betroubare verhuisingsmaatskappy – dit is die moeite werd!
Betaal vir deur-tot-deur-aflewering. Dit is die ekstra werd. Om by ŉ doeanekantoor te sit, is tydrowend en frustrerend!
Maak seker die prys sluit doeaneklaring in SA in.

7. Motorvoertuig

Moenie jou motorvoertuig los om deur iemand anders verkoop te word nie; om uit SA vir geld te baklei is ŉ nagmerrie. Verkoop dit liewer vroeër as later.
Kanselleer jou versekering en hou die bewys van kansellasie. Let op die fynskrif oor kansellasie in jou versekeringskontrak. (Kyk na http://carinsurance.arrivealive.co.za.)
Stel die lisensiedepartement in kennis dat jy die voertuig verkoop het en hou ŉ kopie van die brief of hulle erkenning.
Tweedehandse motors in SA is baie duur, baie duurder as in die VK. As jy jou motor meer as ŉ jaar besit, kan jy dit dalk wettig terugbring SA toe sonder om invoerbelasting te betaal. Kontak fanus@jonck.net vir meer besonderhede.

As jy terug is in Suid-Afrika

1. Bankrekening

SA bankkoste is buitensporig in vergelyking met dié in Europa.
Maak seker jy verstaan die struktuur van jou bankkoste.
Jy sal sukkel om enigiets anders as ŉ spaarrekening oop te maak sonder plaaslike salarisstrokies.
Moenie verwag om met ŉ kredietkaart verwelkom te word as jy nie ŉ groot bedrag geld saambring nie.
Open so gou as moontlik ŉ rekening (ŉ spaarrekening as dit moet) en plaas enkelbedrae uit jou buitelandse rekening oor – dit is goedkoper as om ŉ klomp oorplasings te doen.

2. Belasting

Stel die SAID (SA Inkomstediens) in kennis dat jy terug is en registreer vir belasting.
Dit is in jou eie belang om al jou buitelandse belange te verklaar.
Jy sal die waarde van jou buitelandse beleggings op die datum van jou terugkeer moet bewys.
Jy sal dalk moet bewys dat die geld in die buiteland verdien is (daarom is salarisstrokies nodig).
As jy buitelandse beleggings het, moet jy dalk vir voorlopige belasting registreer.
Onthou jy moet nou in SA belasting betaal op jou inkomste wêreldwyd.
As jy kwalifiseer vir voorlopige belasting, moet jy binne 30 dae nadat jy gekwalifiseer het registreer.
Betaal iemand wat weet wat hulle doen om jou belastingopgawe in te dien. Betaal liewer die professionele fooi – jy sal heelwat meer spaar as wat jy die konsultant betaal.

3. Selfone

Jy kan nie ŉ kontrak kry sonder drie maande se SA salarisstrokies nie.
Jy kan “pay as you go” kry, maar die oproepe is baie duur en jy moet ŉ foon koop.
Vra ŉ familielid om ŉ rekening in sy/haar naam oop te maak en verander die besonderhede sodra jy ŉ salaris kry.

4. Motorvoertuie en motorfinansiering

As jy ŉ tweedehandse motor koop, probeer om van ŉ betroubare handelaar te koop en maak seker presies wat hulle waarborg dek.
ŉ Tweedehandse motor? Sluit aan by die AA – dit is goedkoop en kan jou baie geld spaar.
Ongeag van wie jy koop, neem die motor na die AA vir ŉ onafhanklike ondersoek.
Vra die handelaar uit oor finansiering – daar is maatskappye wat hierin spesialiseer en dit kan die moeite werd wees.
Die bedrag en die rentekoers van finansiering word gebaseer op jou salaris en die persentasie deposito wat jy betaal.

5. Behuising en huisfinansiering

Moet nooit ŉ agent sommer so vertrou as jy ŉ huis wil koop nie.
As jy wel ŉ aanbod maak, maak seker dat dit onderhewig is aan die gebruik van ŉ prokureur van jou keuse. Ook as jy verkoop moet jy die prokureur kies, nie die agent nie. Jy sal niet ŉ verband kan kry as jy kan bewys dat jy werk het en ŉ inkomste verdien.

6. Mediese versekering

ŉ Privaat hospitaal sal jou nie eens by die deur inlaat sonder mediese versekering of ŉ reusedeposito nie. Kry so gou as moontlik ŉ hospitaalplan.
Kry ŉ hospitaalplan van ŉ betroubare maatskappy.
Die meeste hospitaalplanne dek jou nie die eerste drie maande nie; neem reisversekering uit in die land waarvandaan jy kom of registreer vir mediese versekering in SA drie maande voordat jy huis toe kom. Vra jou mediese adviseur uit oor “Gap Cover”; dit is bekostigbaar en dek die verskil tussen jou hospitaalplan en die doktersrekeninge.

7. Versekering

Al verminder misdaad ook is dit steeds ŉ kwessie.
Moet niks teken voordat jy dit nie gelees het en seker is dat jy al die Griekse stukkies onderaan die bladsy ook verstaan nie.
Dit is die moeite werd om rond te kyk, want tariewe verskil dramaties.
Jy kan bekostigbare versekering wat aan jou behoefte voldoen deur ŉ makelaar kry of selfs deur direkte versekering en jy word deur wetgewing beskerm.

8. Bestuurderslisensie

Jy het nou ŉ kaartlisensie nodig; ŉ ID-boekie is nie meer genoeg nie.
Om jou buitelandse lisensie in ŉ SA lisensie om te skakel kan ŉ baie tydsame proses wees. Maak dadelik self ŉ afspraak.
Jy moet dit doen in die dorp of stad waar jou permanente adres geregistreer is.
As jou buitelandse bestuurderslisensie in ŉ ander taal is, gaan na die ambassade en laat dit vertaal voordat jy na die verkeersdepartement gaan.
Jy kan op Arrive Alive meer inligting kry oor die proses.

9. Beleggings

Praat met jou finansiële adviseur oor bydraes tot ŉ uittree-annuïteit, ŉ polis vir verlies aan inkomste, ens. Jy is welkom om fanus@jonck.net te kontak vir advies oor beleggings en belastingaftrekkings op verskillende beleggingsprodukte.

Foto’s: Ahmet Kurt/ Unsplash