Dié tuiskomplek vir ons mens in die buiteland!

Hierdie inisiatief is die ideale platform vir elke Afrikaner wat tans in die buiteland woon, maar graag steeds in voeling met sy geboorteland wil bly. AfriForum Wêreldwyd bied al nagenoeg twintig jaar ’n aanlyn tuiste vir Suid-Afrikaners wat hulself in die buiteland gevestig het.

Die inisiatief behels ’n webtuiste wat mense help om op hoogte te bly van nuusgebeure in Suid-Afrika. Hier kan jy ook betroubare advies kry, sommer net saamkuier, jou ervarings deel en meer vertel oor die interessante plekke waar jy tans woon en werk.

Ons AfriForum Wêreldwyd-span het deeglike navorsing gedoen om te bepaal wat presies vir ons mense in die buiteland belangrik is en daarom is juis dié inligting op die webtuiste beskikbaar gestel. Dit sluit aktuele plaaslike nuus en bydraes soos foto’s en stories van Suid-Afrikaners wat op interessante plekke in alle uithoeke van die aarde woon in, asook ’n Wêreldgids wat enig in sy soort is.

Dié gids maak die wêreld bietjie kleiner, maar jou netwerk groter. Ondernemings vanuit alle uithoeke van die aarde kan opgespoor word op die Wêreldgids. Selfs al gaan jy net op reis in die buiteland, is die Wêreldgids handig – inligting oor ambassades, gastehuise, restaurante en apteke is tot jou beskikking. Die Wêreldgids spog met 40 kategorieë van ondernemings en diensverskaffers regoor die wêreld.

Die Wêreldgids het ten doel om mense wat besig is om in die buiteland aan te pas te help om ander Suid-Afrikaners te ontmoet en terselfdertyd hul ondernemings te ondersteun. Die interaktiewe gids maak dit moontlik vir Suid-Afrikaners in die buiteland om self hul ondernemings gratis in die Wêreldgids te laat opneem.

AfriForum Wêreldwyd het ook ’n nuusbrief genaamd Kollig waarop jy gratis kan inteken. Dié nuusbrief bevat onder meer berigte van die Afrikaanse mediahuis Maroela Media, vars nuus oor feeste en buitelandse optredes deur bekende Suid-Afrikaanse kunstenaars, asook belangrike inligting oor burgerskap, paspoorte, belasting en vele meer.

Daarbenewens is AfriForum Wêreldwyd se Facebook-blad ’n uiters gewilde interaktiewe kuierplek vir alle Suid-Afrikaners, plaaslik en in die buiteland.

AfriForum Wêreldwyd streef voortdurend daarna om Afrikaners op hoogte te hou van die beste byeenkomste in die buiteland waar jy, jou vriende en familielede gesellig kan kuier en ’n gedeelde erfenis kan vier.

In die afgelope aantal jare het ons reeds verskeie medewerkers betrek en nuwe Wêreldwyd-vriende gemaak. Ons vennote sluit onder meer die volgende ondernemings in: South African Events, Texas Potjie, Merise Media en Breytenbachs Immigration Consultants.

Ons sien daarna uit om dié tradisie voort te sit en wil alle Suid-Afrikaanse burgers na die beste van ons vermoë dien – ongeag waar jy jouself bevind.

Bly betrokke en op hoogte van sake in Suid-Afrika.

AfriForum Wêreldwyd – Jou tuiskomplek in die buiteland!

Facebook: https://www.facebook.com/wereldwyd.co.za/
Twitter: @wereldwyd
Instagram: https://www.instagram.com/wereldwyd.co.za/