AfriForum het vandag ’n petisie ingevolge die parlementêre reëls by die parlement ingedien wat die gevaar van die Groenskrif vir maatskaplike sekerheid en die Wysigingswetsontwerp op Immigrasiebelasting uitwys. Die organisasie eis in die petisie dat albei stukke wetgewing onmiddellik onttrek word by gebiede waaraan die Suid-Afrikaanse regering ’n belastingprotes in die gesig sal staar.

Volgens Johan Kruger, hoof van Gemeenskapsontwikkeling by AfriForum, is dit belangrik dat die ANC formeel volgens parlementêre prosesse in kennis gestel word van die gevare wat die volgehoue pogings om die twee stukke wetgewing deur te druk vir Suid-Afrika sal inhou. “Ons moet ons kommer formeel op rekord plaas ingevolge parlementêre prosesse. Ons gebruik dié petisie om formeel te vra dat die twee stukke wetgewing teruggetrek word by gebrekke waaraan Suid-Afrika op die afgrond van ’n belastingprotes staan. Ons verwag nie noodwendig reaksie van ’n hardkoppige ANC nie, maar moet formeel en vir rekorddoeleindes ons kommer en eis by die parlement indien sodat die geskiedenis sal wys dat ons alles in die stryd gewerp het om die ANC te stop om voort te gaan met stappe wat ’n belastingprotes sal ontketen.”

Volgens Kruger is AfriForum sedert die bekendmaking van hierdie twee stukke wetgewing oorval deur keelvol belastingbetalers wat duidelik aantoon dat belastingverset ’n regverdige opsie raak wanneer die regering aktief teen sy burgers regeer en belastingbetalers se kele wil afsny. “Die ANC druk sy ore toe, paai die massas en hoop die belastingbetalers sal aanhou opdok vir die ANC se mislukkings. Die ANC het geen begrip van die vasberadenheid van belastingbetalers om verder belas te word om die ANC se mislukkings te befonds nie.”