Om liefde te vind is nie so maklik soos mielies plant, met beeste boer of perde koop nie – en dis dié tamaai uitdaging wat maak dat mense nie genoeg kan kry van KykNET se trefferreeks Boer soek ’n Vrou nie. In die tiende seisoen is Minki van der Westhuizen terug om tien boere te help om ook in die liefde vooruit te boer. Die seisoen skop af met hoogtepunte van die afgelope seisoene en Minki besoek van die boere uit vorige seisoene om te hoor hoe dit met hulle gaan.

Daar is hierdie seisoen natuurlik weer tien nuwe boere wat na ware liefde op soek is en oudergewoonte kry hulle liefdesbriewe, gaan op blitsafsprake en kuier in die bondel om uiteindelik drie vroue te kies wat saam met hom die pad vat plaas toe. Op die plaas moet die vroue probeer aanpas by die lewe van ’n boervrou en besluit of hulle kans sien vir alles wat daarmee saamgaan, terwyl die boer ’n noukeurige keuse moet maak en ’n vrou kies wat perdalks net die kroon op sy boerdery sal span. Nuwe episodes van Boer soek ’n Vrou is vanaf 13 Oktober binne 24 uur van die kykNET uitsending in Suid-Afrika op ShowMax te sien.