Dapper Media (Edms.) Bpk. is in 2018 gestig as ’n alternatiewe platform waarop gehalte-inhoud oor die vermaaklikheidsbedryf sonder enige inmenging of sensuur aangebied word; ’n platform waar mense met ’n liefde en passie vir die film-, musiek- en produksiebedryf kan bymekaarkom. Met dié platform kan ons programme, stories en musiek wêreldwyd en op enige gegewe oomblik stroom.

So kan jy dan nou ook ’n hartroerende dokumentêr op Dapper Media kyk oor Oudtshoorn, die droogte wat hul getref het en daarna die vernietigende gevolge van COVID-19.

Oudtshoorn was vir vyf jaar lank deur ’n uitmergelende droogte geteister en kort daarna het COVID-19 sy verskyning gemaak. Dit het die hele bedryf tot stilstand gebring. Oudtshoorn het ’n geweldige terugslag beleef; boere, die restaurantbedryf asook die invoer- en uitvoerbedryf.

Die dokumentêr oor Oudtshoorn is opgeneem en vervaardig deur die organisasie Saai. Saai is die Suider-Afrika Agri Inisiatief en is ’n landboubelangenetwerk vir boere, deur boere, wat daartoe verbind is om die regte, waardes, ideale en behoeftes van familieboere in die primêre produksiesektor te beskerm en te bevorder.

Hierdie dokumentêr handel oor die volstruisboere in Oudtshoorn en die daaglikse struikelblokke wat hul uit die weg moet ruim as gevolg van die droogte en die COVID-19-virus wat die wêreld nog steeds teister. Hierdie boere moes leer om te oorleef met die minimum. Dit is ’n nare werklikheid en dit maak jou oë oop vir die struikelblokke waarmee hierdie mense elke dag te doen het.

Daar is ook ’n heerlike insetsels oor kos waar die bekende Meyer le Roux, van die Buffelsfontein-groep, ’n heerlike dis met volstruisvleis voorberei!

Dit is ’n verhaal van hoop, geloof en deursettingsvermoë! Saai wil hierdie boere help en jy kan ook help! Besoek www.saai.org vir meer inligting en gaan kyk hierdie dokumentêr op Dapper Media se webtuiste.

Die belangrikste ding is, gaan kuier vir hierdie boere! Ondersteun hul en gaan maak kennis met hierdie wonderlike mense en diere!

Besoek gerus Dapper Media se Facebook-blad.