Woes is ’n vermaak- en interaktiewe program wat fondsinsamelingsprojekte doen deur middel van lootjieverkope en regstreekse veilings.

Hierdie spesifieke vertoning word in Woes-styl deur Jaco van Dyk en Hamilton Wessels aangebied en word regstreeks vanuit die AfriForum Teater uitgesaai.

Die fondse wat ingesamel word, word geskenk aan Johan Opperman, ’n klanktegnikus wat saam met verskeie bekendes al die land vol getoer het. Johan is onlangs met aggressiewe kanker gediagnoseer en benodig dringend fondse vir sy behandeling.

Sy vriende in die musiekbedryf, Appel, Ricus Nel, Irene-Louise en ADAM het besluit om ’n Woes-vertoning te doen om geld vir sy behandeling in te samel.

’n Paar tafels word aan die publiek beskikbaar gestel om die aand aan die veiling deel te neem, lekker te eet en na hul gunstelingkunstenaars te luister. Neem kennis dat dit nie ’n normale vertoning is nie en dat die vertoning opgedeel word met veilings tussenin deur die twee aanbieders. Die publiek kan ook aanlyn na die vertoning kyk en aan die veiling deelneem.

Alle fondse wat uit kaartjieverkope, lootjies en veilings gegenereer word, sal ten volle aan Johan Opperman geskenk word.

KOOP KAARTJIES

Moenie uitgesluit voel as jy in die buiteland is nie, want jy kan hierdie vertoning GRATIS stroom! Die skakel word binnekort bekend gemaak.