Bring die braaihout en die -sout, steek die vuurtjie aan en skuif reg vir aksie. Jan Braai vir Erfenis is terug vir ’n sewende seisoen van vleis op die kole wat jou mond gaan laat water. Dié seisoen besoek Jan interessante plekke soos die Timbavati Wildreservaat, die Overberg, Oranjemund in Namibië en Moditlo in die Bosveld. Jan wyk selfs sover uit as Amsterdam om te gaan kyk hoe die Nederlanders Koningsdag vier.

Dit is nie asof dit moeilik is om mense te oortuig om te braai nie, maar in seisoen 7 gaan Jan sowaar uit sy pad! Daar is die Tour de Braai, ’n fietstoer vanaf George al langs die Buffeljagsrivier. Jan en 25 fietsryers vat die pad en vind trap-trap die beste braaiplekke langs die pad. Hulle stop in Oudtshoorn, Calitzdorp, Van Wyksdorp en Riversdal. Die Europese been van hierdie seisoen se braaitoer neem Jan van Amsterdam tot in Geraardsbergen en Brussel in België waar hy aan allerhande plaaslike lekkernye smul en op vreemde plekke braai.

Natuurlik is daar in dié seisoen ook weer ’n verskeidenheid resepte wat Jan met sy kykers deel. Verbeel jou ’n T-been-steak met mosterdroomys, steak in ’n biltongkors en selfs ’n koffiesteak. Jy gaan ook leer om steak-espetadas op die braai te maak, watter tipe port die lekkerste saam met ’n braai smaak, asook hoe om die heerlikste Marmite-en-kaassous vir jou braaivleis te maak. In een episode demonstreer ’n kenner hoe om ’n heel skaap te ontbeen, en op besoek aan die Kleinrivier-kaasplaas sal jy uitvind hoe om die moeder van alle braaibroodjies te maak.

Indien jy dus moeg is daarvoor om in jou agterplaas te braai, gaan op reis saam met Jan Braai en kyk hoe hy allerhande eksotiese braaiplekke uitsnuffel wat jou weer sal inspireer om oorspronklik en kreatief te raak wanneer jy self ’n vuurtjie aansteek. ShowMax, jou braai-inspirasie!