Met Kraal Uitgewers se nuwe digitale platform, Kraal Afgestof, word ouer geskiedeniswerke afgestof om ’n nuwe, gedigitiseerde baadjie aan te trek. Herontdek verskeie bekende, minder bekende en selfs vergete geskiedenisboeke uit ons geskiedenis met Kraal Afgestof. Die eerste boek op die Afgestof-boekrak, Jopie Fourie: ’n Lewenskets, is onlangs vrygestel en is nou aanlyn beskikbaar by www.kraaluitgewers.co.za. Dié platform is gratis beskikbaar aan alle nuusbriefintekenare.

Fourie, waarskynlik die bekendste held van die Rebellie van 1914, het in die ure vóór sy dood ’n aantal briewe aan sy volk, sy vrou en familie geskryf. Nadat hy op 19 Desember 1914 skuldig bevind is aan verraad (omdat hy as lid van die Unie-Verdedigingsmagte aktief aan die Rebellie deelgeneem het) is die vonnis gelewer. Dit is minder as 24 uur later voltrek. Ten spyte van die emosies wat sekerlik in sy binneste moes woed in dié tyd, het hy in ʼn brief aan sy volk ’n treffende oproep gelewer. Sy “vermaning”, soos hy dit self stel, is eenvoudig, maar dra nou nog net soveel betekenis as tydens die worstelinge van 1914: “Wees getrou tot die dood. Wees getrou aan u tradisies, aan u taal en aan u volk.” Sy dood voor ’n vuurpeleton om 05:00 op Sondag 20 Desember 1914 het geweldige ontsteltenis onder Afrikaners veroorsaak. Lees meer oor Jopie se laaste oomblikke in Jopie Fourie: ’n Lewenskets, nou beskikbaar op die Kraal Afgestof-boekrak.