Kook en Geniet is ’n ikoniese resepteboek – en nou het dié staatmaker sy eie kosprogram gekry! Lise Swart is die aanbieder wat saam met ’n verskeidenheid Suid-Afrikaners agter die kospotte inskuif om te hoor watter invloed dié boek op hulle lewens gehad het. Sy gesels onder andere met die dogters van mev. S.J.A. de Villiers, skrywer van dié kookboek, en ontmoet die uitgewers van die boek.

Kosredakteurs vertel hoe die resepte in Kook en Geniet opweeg teen die resepte in tydskrifte, en bloggers toets of die resepte vir moderne verbruikers geskik is. Lise klop ook by sjefs en spyseniers aan om te kyk hoe die resepte in Kook en Geniet hulself tot die professionele kosbedryf leen. Kook en Geniet is veral gewild onder pasgetroudes wat vir die eerste maal leer kosmaak, en in die reeks waag twee sulke vroue hul hand aan sommige van die resepte. Kinderkokke maak ook ’n draai om hul vaardigheid te kom wys met resepte uit Klein Kook en Geniet, terwyl ’n eetklub ’n hele maaltyd uit Suid-Afrika se gunstelingkookboek voor. Twee resepteboekskrywers en lede van die Vrouelandbouvereniging wys ook hul staal in die kombuis met resepte uit Kook en Geniet: Soet suurdeegbrood, appelkooskonfyt, lamsboud en broodpoeding was nog nooit so lekker nie! Uiteindelik woon ons ook ’n deftige teepartytjie by wat deur die ACVV op Franschhoek vir bejaardes op die dorp voorberei word. In die laaste episode wys Lise sélf hoe haar kookkuns met die hulp van Kook en Geniet verbeter het deur vir mense na aan haar hart ’n maaltyd voor te berei. Hierdie reeks sal jou mond laat water en jou lekker lus maak om self jou hand aan heerlike Suid-Afrikaanse kontreikos te waag. Teken in op Showmax as jy wil aansit vir watertand kosprogramme soos Kook en Geniet, net wanneer en waar jy wil.