Deur Sue-Ann de Wet

Aanpassing word dikwels verkeerd verstaan. Dit word gelykgestel aan stil raak, minder wees, of jou unieke gewoontes en waardes eenkant toe skuif om in te pas. Vir baie mense, veral dié wat hulself in ’n nuwe omgewing bevind, voel aanpassing soos ’n verlies van identiteit.

Maar ware aanpassing vra nie dat jy jouself moet prysgee nie. Dit vra selfkennis.

Om aan te pas beteken om nuwe onuitgesproke reëls te leer: hoe dinge werk, hoe mense met mekaar omgaan, en wat in ’n spesifieke omgewing verwag word. Dit vra dat jy luister, waarneem en leer. Maar dit beteken nie jy moet jou geskiedenis, jou taal of jou waardes prysgee om aanvaar te word nie. Ware aanpassing gebeur nie wanneer jy minder van jouself word nie, maar wanneer jy met selfvertroue jou plek vind in ’n nuwe ruimte.

Dit is juis hier waar moedertaal ’n stille, maar kragtige rol speel. Wanneer mense voel hulle moet hul taal wegsteek om in te pas, raak aanpassing ’n vorm van innerlike verlies. Maar wanneer moedertaal erken word as deel van jou identiteit, iets wat jou dra eerder as terughou, word dit ’n bron van innerlike sekerheid.

Wanneer jy jouself prysgee ter wille van aanpassing, is dit moeilik om te voel jy behoort. Dit berus op voortdurende waaksaamheid: Pas ek nou in? Is ek te anders? Hierdie spanning lei nie tot verbondenheid nie, maar tot uitputting. Moedertaal, daarenteen, bied ’n ruimte waar jy nie hoef te verduidelik of te verdedig wie jy is nie.

Gesonde aanpassing begin by ’n innerlike sekerheid. Dit is die wete dat jy kan leer, luister en groei sonder om jou kern te verloor. Dat jy nuwe tale kan aanleer, nuwe gewoontes kan ontdek en nuwe verhoudings kan bou, sonder om minder van jouself te word.

Daar is ’n verskil tussen respek en om jouself prys te gee. Respek vra dat jy oop is vir ander; maar om jou eie stem stil te maak vra dat jy jouself weggee. Respek bou volhoubare verhoudings en skep ruimte waar identiteit en aanpassing langs mekaar kan bestaan.

By AfriForum Wêreldwyd glo ons dat volhoubare aanpassing begin waar mense hul wortels erken. Wanneer taal, kultuur en waardes met selfvertroue geleef word, raak aanpassing nie ’n verlies nie maar ’n uitbreiding.

Aanpassing vereis nie dat jy jouself moet prysgee nie.
Dit is die vermoë om jouself te wees, ook in ’n nuwe wêreld.

Lees ook: Versterk familiebande oor die kontinente