Hierdie likkewaan is by die Sabierivier naby die Onder-Sabie-ruskamp in die Nasionale Krugerwildtuin deur Katie Visagie verfilm. Van wat haar man André kan aflei, is die grootste Afrika-likkewaan se lengte nie meer as 244 cm nie. Hierdie knewel se lengte is egter veel meer as dit! ’n Tweede groot likkewaan kan sowat 38 sekondes van die begin van die video af op die rotse agter hierdie een gesien word.

Likkewane is behoort aan ’n baie ou, maar hoogs ontwikkelde familie van akkedisse. Hulle kan rats klouter, loop en swem, en word soms in geskokte voorstedelinge se swembaddens aangetref! Hulle is dagdiere met ’n dieet wat ’n wye verskeidenheid prooi insluit, soos ander akkedisse, amfibieë, voëls, slange, skilpaaie, eiers, klein soogdiere, duisendpote, kewers, weekdiere en skerpioene. Skilpaaie word dikwels dop en al ingesluk en hulle kan duisendpote vreet omdat likkewane bestand teen duisendpote se giftige afskeidings is. Hulle sal selfs soms dierekarkasse vreet en speel dus ook ’n belangrike rol om die veld skoon te hou.

Die beeldmateriaal is deur Katie en André van Two-V Productions op hulle You Tube-kanaal geplaas. Hartlike dank aan hulle vir pragtige video’s! Teken asseblief in op dié kanaal en volg hulle Facebookblad. Boeke in hulle Op Vlerke-reeks kan van Loot bestel word en sal ook binnekort weer in die winkels in ruskampe van die Nasionale Krugerwildtuin beskikbaar wees.