Two-V Productions se André en Kate plaas gereeld video’s van hulle ontmoetings met natuurlewe tydens hulle besoeke aan die Krugerwildtuin.

Hulle nooi die lesers van Kollig uit om hulle liefde vir die natuur te kom geniet met ons gereelde rubriek, Natuurhoekie.

Al die geluide wat julle in hulle video’s sal hoor, is die oorspronklike bos- en wildklanke. Hulle is hartstogtelike voorstanders van natuurbewaring en nooi julle ook uit om op hulle YouTube-kanaal, Two-V Productions, in te teken en te gaan hou van hulle Facebookblad. Boeke in die Op Vlerke-reeks kan van Kraal Uitgewers bestel word. Dit is ook by die winkels in die ruskampe van die Krugerwildtuin te vinde. Let wel dat die boeke slegs in Afrikaans beskikbaar is.

Vandeesweek kyk ons hoe ’n gewone nagreier ’n naaldekoker probeer vang om dit as aas in te span.

Die gewone nagreier probeer ’n naaldekoker vang om dit as aas in Panic-meer naby Skukuza-ruskamp in die Krugerwildtuin te gebruik. Nadat die reier die naaldekoker gevang het, sal dit op die oewer van die meer gaan sit, die insek in die vlak water gooi en wag dat dit visse lok.

’n Reier is selfs al waargeneem waar dit in ‘n dam in Singapoer se botaniese tuin stukkies brood inspan om vis te vang. Dit is bekend dat hulle allerlei aas gebruik om visse nader te lok, insluitend lewende insekte, vrugte en selfs takkies wat hulle in die water gooi.