Deur Alana Bailey
In die dae toe ons nog Kerskaarte vir mekaar gepos het (en die Suid-Afrikaanse Poskantoor nog afgelewer het), was prentjies van rooiborsies nie ’n onbekende gesig nie. ’n Artikel beskryf hulle as klein voëltjies met groot persoonlikhede.
Plaaslik is die janfrederikke baie soortgelyk. Ek wil hulle amper as die Jack Russells van die voëlwêreld beskryf. Klein, nuuskierig en glad nie skaam of skrikkerig vir mense nie.
Om die twee soorte vrolike tuinvriende te vergelyk, is nogal interessant:
| Europese rooiborsies | Gewone janfrederikke |
|---|---|
| (Erithacus rubecula) | (Dessonornis caffer) |
| Naam kom van die voorkoms | Naam kom van die voël se roep |
| Rooi borsvere | Oranje borsvere |
| Geslagte lyk eenders | Geslagte lyk eenders |
| Weeg 14-25 gram | Weeg gemiddeld 28 gram |
| Lengte van snawel- tot stertpunt: 12-14 cm | Lengte van snawel- tot stertpunt: 16-17 cm |
| Sing veral met sonop en sononder | Sing veral met sonop en sononder |
| Beide geslagte sing | Beide geslagte sing |
| Vreet veral insekte, maar ook saad en vrugte | Vreet veral insekte en klein reptiele, maar ook saad en vrugte |
| Kom voor in Brittanje, Europa, Noord-Afrika, Midde-Ooste en Sentraal Asië | Kom voor in suidelike en oostelike Afrika |
| Gemiddelde lewensverwagting: 13 maande, maar in een gedokumenteerde geval het een 19 jaar oud geword | Gemiddelde lewensverwagting is onseker, maar in een gedokumenteerde geval het een al 17 jaar oud geword |
| Lê 4-7 eiers | Lê 2-3 eiers |
| Eiers is witterig met rooibruin spikkels | Eiers is wit- of pienkerig met rooibruin spikkels |
Daar is dus baie ooreenkomste tussen die twee spesies. Beide beweeg ook wip-wip deur die tuine, velde of beboste gebiede waar hulle woon en jag.
Die foto’s is van ’n rooiborsie in die Cotswolds in Engeland, en van die eiers en kuikens van ’n paar janfrederikke wat in my tuin in Pretoria gebroei het.
Die janfrederikke se nesbouproses is indrukwekkend – een lid van die broeipaar week sy of haar buikvere in water om die nesmateriaal nat te maak, sodat dit sag word en makliker in ’n kommetjievorm omskep kan word. Die ander maat dra die nesmateriaal aan.
Beide soorte voëls is so algemeen in die gebiede waar hulle voorkom, dat ’n mens hulle maklik kan miskyk, maar met sonop of sononder beur hulle vrolike sang ’n mens daagliks op.
Deel op
