Modder en Bloed is nie jou tipiese Boereoorlogfliek nie. Dis ’n goedvoelfliek met ’n massiewe hart, en hoewel die geweld en onreg van oorlog deel van die storielyn vorm, is dit vriendskap, waagmoed en spangees wat die botoon voer. Die fliek fokus op ’n groep krygsgevangenes op St. Helena wat deur die Engelse troepe aan rugby bekend gestel word.

Hulle word deur die sadistiese en wrede kolonel Swannell tot ’n wedstryd uitgedaag – krygsgevangenes teen Engelse kampwagte, en daar volg ’n epiese stryd wat ’n rugbywêreldbekerwedstryd soos ’n kinderpartytjie laat lyk. Die ensemble bestaan uit bekende en begaafde Suid-Afrikaanse akteurs soos Stian Bam, Jacques Bessenger, Deon Lotz, Edwin van der Walt, Gustav Gerdener en De Klerk Oelofse. Grant Swanby blink uit as die booswig, kolonel Swannell. Sean Else doen baie goeie werk as regisseur, terwyl uitstekende kostuums en kamerawerk tot ’n baie bevredigende fliekervaring bydra. Hierdie fliek bied nie net iets vir aanhangers van rugby of diegene met ’n belangstelling in die Boereoorlog nie – die universele temas en sterk storielyn verseker dat elke persoon meegevoer word en diep meegevoel met die lot van die karakters ontwikkel. As jy nog nie op Showmax ingeteken het nie, maak onmiddellik so vir toegang tot die beste Suid-Afrikaanse vermaak.