’n Onskuldige klein leuentjie kan jou soms diep in die moeilikheid laat beland. Dít is wat die motorwerktuigkundige Ben in die Afrikaanse romantiese komedie Sy klink soos lente moet leer. Ben ontmoet Linda in ’n kroeg, maar dink onmiddellik dat sy te goed is vir hom omdat sy ’n ouditeur is en hy aan motors werk. Om haar te beïndruk vertel hy haar dat hy deel van ’n musiekgroep is, en dan moet hy vinnig spring om dié storie te laat realiseer voordat sy die waarheid uitvind. Dinge raak egter vinnig selfs meer gekompliseerd wanneer Ben uitvind wie Linda se pa is: Niemand anders nie as sy baas by die werkswinkel waar hy werk!

Amalia Uys en Stiaan Smith vertolk die hoofrolle in Sy klink soos lente, en die byspelers sluit bekendes soos Bennie Fourie, Bouwer Bosch, Pietie Beyers, Wilson Dunster en Elize Cawood in. Boonop is daar ook aangename musiek op die klankbaan – hoe dan anders met ’n fliek wat oor ’n musiekgroep gaan, al is dit dan ’n opgemaakte een. As jy van ’n romantiese komedie met lekker vleis aan die been hou, kyk sommer vandag nog Sy klink soos lente op ShowMax, waar jy al die beste Afrikaanse en internasionale flieks en reekse op een plek sal vind.